Një incident i rëndë është regjistruar në qytetin e Nablusit, në Bregun Perëndimor të pushtuar, ku forcat izraelite kanë ndërmarrë një operacion ushtarak të martën në mëngjes. Gjatë bastisjes, është qëlluar me armë zjarri Mahmoud al-Kharraz, një palestinez 32-vjeçar, i cili ndodhej në zonën e bastisjes.

Pamjet e publikuara nga mediat lokale dhe dëshmitarët në terren tregojnë momentet dramatike kur al-Kharraz u qëllua në një rrugë të ngushtë të qytetit, ndërsa banorët përpiqeshin të largoheshin nga përplasjet. Sipas burimeve spitalore, ai u dërgua me urgjencë në një qendër mjekësore, por nuk mundi t’u mbijetojë plagëve të marra dhe ndërroi jetë pak më vonë.

Autoritetet palestineze e kanë cilësuar vrasjen si një “ekzekutim të ftohtë”, ndërsa forcat izraelite nuk kanë dhënë ende një koment zyrtar mbi rrethanat e operacionit. Organizatat për të drejtat e njeriut kanë shprehur shqetësim të thellë për përdorimin e forcës vdekjeprurëse në zonat e banuara, ndërsa tensionet në territoret palestineze vazhdojnë të jenë të larta.

Ky është një tjetër rast që shton numrin e viktimave në mesin e civilëve palestinezë në Bregun Perëndimor, ku përleshjet mes ushtrisë izraelite dhe banorëve lokalë janë bërë gjithnjë e më të zakonshme në muajt e fundit.