Vatikan — Kardinalët e përfshirë në konklavën sekrete do të rikthehen mëngjesin e sotëm në Kapelën Sistine për të vijuar procesin e zgjedhjes së Papa-s së ardhshëm. Pas një dite të parë pa rezultat, votimet do të rifillojnë me ritëm të intensifikuar.
Sipas protokollit të Vatikanit, janë planifikuar katër raunde votimi përgjatë ditës së sotme: dy në mëngjes dhe dy të tjera në pasdite. Votimi i parë do të zhvillohet në orën 10:30, ndërsa i dyti në orën 12:00. Pas një pushimi të shkurtër gjatë drekës, kardinalët do të votojnë sërish në 17:30 dhe 19:00.
Megjithatë, për çdo seancë të dyfishtë votimi, tymi del vetëm pas përfundimit të të dy votimeve. Kjo do të thotë se nëse një Papa zgjidhet në njërën nga votat e paradites ose pasdites, tymi i bardhë do të ngrihet për të shpallur lajmin vetëm në fund të atij blloku votimi.
Një ditë më parë, asnjë kandidat nuk arriti të sigurojë shumicën e nevojshme prej dy të tretave të votave. Procesi mbetet i mbyllur për publikun, por sytë e botës janë drejtuar nga oxhaku i Kapelës Sistine, në pritje të sinjalit të bardhë që do të lajmërojë zgjedhjen e Papës së ri.
