Mbi 1,500 të rinj, pjesëmarrës në programin edukativ Birthright Israel, janë evakuuar nga Izraeli drejt Qipros përmes një anijeje luksoze kroçere, pasi përshkallëzimi i sulmeve me Iranin ka bërë që vendi të përballet me pasiguri të thellë. Anija Crown Iris, e operuar nga kompania Mano Maritime, u nis në një operacion sekret, e shoqëruar gjatë gjithë udhëtimit nga Marina Ushtarake izraelite për të garantuar sigurinë e pasagjerëve.
Pjesa më e madhe e të evakuuarve ishin shtetas amerikanë, të cilët më pas u transportuan me avionë të posaçëm të organizuar nga guvernatori i Floridës, Ron DeSantis, për t’u rikthyer në SHBA. Ndërkohë, më shumë se 1,000 të rinj të tjerë nga grupi Birthright ndodhen ende në Izrael ose janë larguar me mjete të tjera, sipas Jerusalem Post.
“Ky ishte një operacion i ndërlikuar dhe emocional, i zhvilluar nën presion ekstrem. Jemi krenarë që arritëm t’i çonim në siguri 1,500 të rinj në Qipro,” deklaroi Gidi Mark, CEO i Birthright Israel.
Mandi Kuran nga Australia ndau emocionet e saj në rrjetet sociale: “Pata mundësinë të kërceja sërish me 1,500 vëllezërit e motrat e mi dhe tani jemi të sigurt në Qipro. Jam përjetësisht mirënjohëse ndaj qeverisë izraelite dhe organizatës Birthright.”
Një tjetër pjesëmarrës, Josh Goldberg nga Tenesi, përshkroi në rrjete sociale natën e bombardimeve dhe më pas “zhvendosjen e paparë” me një kroçere të madhe nën mbrojtjen e marinës izraelite dhe me mbështetje logjistike nga Garda Kombëtare e Floridës: “Kjo s’ishte në kartën time të bingos këtë verë!”
Evakuimi vjen ndërsa më shumë se 2,800 pjesëmarrës të Birthright Israel ndodheshin në vend në momentin kur Izraeli nisi sulmet ajrore ndaj Iranit, më 13 qershor. Për pasojë, shumë fluturime janë anuluar dhe dhjetëra mijëra udhëtarë kanë mbetur të bllokuar.
Izraeli mbylli përkohësisht hapësirën ajrore për shkak të përshkallëzimit të konfliktit, duke pezulluar gjithashtu një sërë aktivitetesh të planifikuara për 25-vjetorin e Birthright. Sipas Ministrisë së Transportit, mbi 50,000 qytetarë izraelitë ndodhen ende jashtë vendit dhe po përpiqen të kthehen, ndërsa kompanitë ajrore izraelite kanë marrë leje të posaçme për të rifilluar fluturimet nga jashtë.
