Nxënësit zbulojnë llogarinë e OnlyFans të mësueses – hiqet nga detyra pasi imazhet përhapen në shkollë
Një mësuese fizike në Skoci është përjashtuar nga profesioni pas zbulimit të llogarisë së saj në OnlyFans nga nxënësit, të cilët shpërndanë imazhet eksplicite brenda shkollës.
Kirsty Buchan, 34 vjeçe, u hoq nga regjistri i mësuesve nga Këshilli i Përgjithshëm i Arsimit në Skoci (GTCS), pasi u vërtetua se kishte shkelur rëndë etikën e profesionit duke postuar përmbajtje pornografike nën pseudonimin “Jessica Jackrabbit x”.
Nxënësit e shkollës Bannerman High School në Glasgow e kishin zbuluar profilin e saj në nëntor 2022 dhe kishin njoftuar drejtoreshën e shkollës se “ajo do të shpërthente nga inati” kur të mësonte se imazhet e saj po qarkullonin mes nxënësve.
Drejtoresha Seonaidh Black rrëfeu para komisionit disiplinor se ishte tronditur kur, në fund të një dite mësimore, zëvendësdrejtoresha e saj i tregoi disa foto të zonjës Buchan me të brendshme, të cilat ia kishin treguar nxënës të klasës së pestë të ciklit të mesëm (S5).
“U afrova nga disa djem të klasës së pestë dhe të gjashtë, shumë të eksituar. Më thonin: ‘Ke dëgjuar lajmin?’ Unë u përpoqa ta shmangja temën. Ata më thanë: ‘Kur ta mësosh, do të çmendesh. Kërko për Jessica Jackrabbit.’”
Sipas saj, brenda pak minutash të gjithë në shkollë e dinin lajmin. Ajo tregoi se kishte pasur raste të mëparshme kur kishte paralajmëruar zonjën Buchan për mungesë gjykimi në menaxhimin e rrjeteve sociale, por pa ndonjë incident të rëndë.
Buchan, një nënë e një fëmije, ishte më parë vetë nxënëse në të njëjtën shkollë, përpara se të bëhej pjesë e stafit mësimor. Ajo dha dorëheqjen në muajin që u zbulua llogaria, por kontrata e saj përfundoi në janar 2023.
Sipas drejtoreshës, një prind e kishte njoftuar se djali i saj kishte shkruar komente në llogarinë OnlyFans të mësueses. Pas largimit nga shkolla, Buchan ka deklaruar publikisht se ka fituar deri në 60,000 paund në një muaj nga postimi i përmbajtjes eksplicite.
Megjithëse kanë kaluar mbi dy vite nga incidenti, tema vijon të jetë e gjallë në komunitet. Drejtoresha tha:
“Ka ende biseda për këtë. Vetëm javën e kaluar, disa prindër në takim përmendën sërish OnlyFans. Për disa në këtë komunitet, emri i shkollës është tashmë i lidhur me një mësuese që kishte profil pornografik.”
Hetuesja e rastit, Hannah Oakley, deklaroi se profili i zonjës Buchan në OnlyFans ishte publik dhe i aksesueshëm pa regjistrim apo pagesë. Ajo shtoi se përmbajtja e tij ishte “qartësisht pornografike dhe eksplicite” dhe se vetë mësuesja përmendte profesionin në biografi me shprehjen: “Mësuese e mirë që është kthyer shumë e keqe.”
GTCS argumentoi se ajo nuk kishte marrë masa për të mbrojtur identitetin e saj profesional dhe kishte vendosur reputacionin e arsimit në rrezik. Gjithashtu, u theksua se ajo kishte dhënë edhe intervista publike për këtë çështje, duke e bërë çështjen edhe më të ekspozuar.
Zëdhënësi i GTCS, Gary Burton, theksoi se zonja Buchan kishte dështuar të jetë një model për nxënësit dhe kishte humbur integritetin profesional. Ai shtoi se ajo nuk kishte marrë pjesë në asnjë fazë të procesit dhe nuk kishte shfaqur asnjë shenjë reflektimi apo pendese.
“Sjellja e saj është thelbësisht e papajtueshme me rolin e një mësueseje. Ajo përdori profesionin e saj si mjet për të tërhequr klientë në përmbajtjen e saj seksuale. Kjo është një shkelje e qartë e detyrimeve të një mësueseje në pozicion besimi.”
Paneli i GTCS konstatoi se të gjitha akuzat ndaj saj ishin të provuara dhe shpalli vendimin për ta përjashtuar përfundimisht nga profesioni i mësuesisë.
Seanca vijon për të përcaktuar nëse vendimi do të bëhet i përhershëm në të gjitha institucionet arsimore në Skoci.
