Noel Gallagher u pa me një fytyrë të ngrirë dhe të vetmuar ndërsa udhëtonte me linjën District të metrosë për t’u bashkuar me vëllain e tij Liam në provat e grupit Oasis të martën.

Rokeri 58-vjeçar kishte një pamje të thjeshtë teksa shkonte drejt një studioje sekrete në Londër, ku do të bashkohej me vëllain e tij 52-vjeçar për prova – për herë të parë pas 16 vitesh, para fillimit të turit të shumëpritur të ribashkimit.

Dy vëllezërit, të njohur për përplasjet e tyre të mëhershme, duket se kanë lënë pas diferencat dhe kanë shpallur se do të mbajnë disa koncerte të Oasis këtë verë.

Ndërsa Noel dhe pjesa tjetër e grupit kishin nisur tashmë provat pa këngëtarin kryesor, Liam më në fund iu bashkua atyre për një provë të plotë të repertorit pak javë para nisjes së turit botëror.

Në stilin e tij tipik kaotik, Liam mbërriti në prova me një furgon të mbushur me karamele për fyt dhe shurup, duke sugjeruar se kordat e tij zanore kishin nevojë për përkujdesje.

Kjo do të ishte hera e parë që Noel dhe Liam performojnë së bashku që nga festivali V Festival në Staffordshire, në gusht 2009. Vetëm disa ditë më vonë, grupi u shpërbë pas një debati të madh pak para se të ngjiteshin në skenë në festivalin Rock en Seine në Paris.

Dhe megjithëse është një moment historik për fansat, Noel nuk mundi të buzëqeshte teksa priste metronë në stacionin Paddington më herët gjatë javës.

Pavarësisht se ka një pasuri të vlerësuar në 53 milionë paund, ai u fut në linjën District i vetëm dhe udhëtoi në mënyrë modeste drejt vendndodhjes së panjohur për të vazhduar përgatitjet për turin.

Në kontrast të plotë, mbërritja e Liam-it ishte gjithçka veçse e qetë, me fotografë që përpiqeshin të kapnin pamje të tij teksa mbërrinte për herë të parë pas vitesh në prova.

Megjithatë, në një pamje që mund të shqetësojë mbajtësit e biletave, ai u pa në furgon me ilaçe për fyt dhe shurup.

Liam ka shprehur së fundmi entuziazmin për t’u ribashkuar me grupin duke iu përgjigjur pyetjeve të fansave në X (ish-Twitter) të dielën në mëngjes.

Një fans e pyeti: “Gëzuar të dielën, burrë! Je gati për provat? Kanë mbetur vetëm pak ditë dhe ti do t’u bashkohesh të tjerëve?”

Liam u përgjigj: “Po Rasta D, jam aty të martën për t’ua hedhur mendjen në erë.” Një tjetër e pyeti nëse ishte “i emocionuar” për të nisur provat, dhe Liam tha: “Nuk po rri dot pa filluar.”

Ndërkohë, ai konfirmoi sërish se do të merrte pjesë në prova, pasi një tjetër fans e pyeti: “Sa do të zgjasë dita jote e provave? Do hysh e do dalësh shpejt?”

Ai u përgjigj: “Do këndoj setin dhe do iki, nuk rri kot.”

Këngëtari i “Morning Glory” shtoi gjithashtu se ndjehej “biblik” dhe nuk do të qëndronte për foto: “Nuk do më shihni, nuk jam për poza, do jem brenda e jashtë.”

Në prill u raportua se Noel kishte nisur provat për rikthimin e shumëpritur të Oasis këtë verë.

Vetëm disa muaj larg ribashkimit në skenë, Liam thuhej se po e vendoste “pushimin” si prioritet para se të ribashkohej në studio me vëllain e tij.

Një burim pranë Noel-it i tha The Mirror: “Noel është vazhdimisht në studio duke punuar me materiale – është kantautor, kështu që është natyrshëm aktive.

Por Liam është këngëtar dhe ka një listë të gjatë koncertesh me Oasis këtë vit, kështu që nuk do të lodhet shumë me prova. Pas një turneu të gjatë solo për Definitely Maybe vitin e kaluar, ajo që i duhet më shumë zërit të tij tani është pushimi.”

Turi Oasis Live 25 nis më 4 korrik në stadiumin Principality në Cardiff, për të vazhduar me koncerte të shitura në Heaton Park në Manchester, Wembley Stadium në Londër dhe Murrayfield Stadium në Edinburg.

Më pas, vëllezërit do të nisin një turne global me ndalesa në Japoni, Argjentinë, SHBA dhe Brazil.

Ndërkohë është zbuluar se e bija e Noel-it, Anais, ka qenë mbrapa ribashkimit të vëllezërve dhe rikthimit të Oasis në skenë.

Modelja 25-vjeçare thuhet se i “mbolli idenë” e pajtimit të dy vëllezërve dhe i ndihmoi të afroheshin sërish.

Anais thuhet gjithashtu se ndihmoi në krijimin e listës së këngëve dhe dha ide mbi çfarë do të donin të dëgjonin fansat e rinj.

Sipas The Sun, një burim tha: “Anais e kuptonte që babai i saj donte të kishte të dy vëllezërit, Liam-in dhe Paul-in, pranë pas ndarjes së grupit, ndaj u përpoq me çdo kusht t’i sillte bashkë.

Ajo ka marrëdhënie shumë të mirë me djemtë e Liam-it, Gene dhe Lennon, dhe i pyeti nëse babai i tyre do të ishte i gatshëm ta dëgjonte.

Kjo i lejoi asaj të mbillte idenë e pajtimit në të dy anët. Falë marrëdhënies së ngushtë me Liam-in, ajo ishte në gjendje ta thërriste. Pasi Liam telefonoi Noel-in, pjesa tjetër mbeti në duart e tyre.”

Anais është parë shpesh me kushërinjtë e saj Molly, Lennon dhe Gene, duke ndjekur ngjarje së bashku.

Nëna e Molly është Lisa Moorish, me të cilën Liam pati një marrëdhënie të shkurtër ndërkohë që ishte i martuar me Patsy Kensit në vitin 1998.

Liam nuk e takoi Molly-n deri në vitin 2018, pas së cilës shprehu shpresën që të mbetej pjesë e jetës së saj.

Liam ka Lennon-in, 25 vjeç, me ish-bashkëshorten Patsy Kensit, dhe Gene-in, 23 vjeç, me këngëtaren Nicole Appleton, me të cilën ishte në lidhje pas divorcit me Patsy në vitin 2000.