Dy fëmijët që u vranë në një sulm ndaj një shkolle katolike në Minneapolis janë identifikuar nga prindërit e tyre si Harper Moyski, një motër e madhe “plot gëzim”, dhe Fletcher Merkel, i cili adhuronte “çdo sport që i lejohej të luante”.
Gjatë meshës në Kishën Katolike të Shpalljes (Annunciation) të mërkurën, Harper, 10 vjeç, dhe Fletcher, 8 vjeç, u vranë në një sulm me armë që plagosi gjithashtu 18 persona.
“Dje, një frikacak vendosi të na merrte djalin tonë 8-vjeçar, Fletcher”, tha i ati, Jesse Merkel, në një konferencë për shtyp të enjten, duke shtuar: “Ju lutem, kujtojeni Fletcher për atë që ishte, e jo për aktin që i mori jetën.”
Familja e Harperit tha se ajo ishte “e ndritshme, plot gëzim dhe e dashur thellësisht”. Në një deklaratë emocionuese për gazetarët, zoti Merkel tha se, për shkak të sulmit që i mori jetën Fletcherit, “ne nuk do të kemi më mundësinë ta mbajmë në krahë, të flasim me të, të luajmë me të dhe ta shohim teksa rritej në një djalë të mrekullueshëm, rrugën e të cilit e kishte nisur.”
Ai shtoi se i biri e donte familjen, gatimin dhe sportin – sidomos peshkimin. Merkel shprehu shpresën që të plagosurit të shërohen shpejt dhe viktimat – sidomos fëmijët – të mund të “shërohen mendërisht dhe të gjejnë forcë për të jetuar jetë të mbushura me dashuri, gëzim dhe plotësim.”
Duke mos përmbajtur lotët, ai kërkoi që publiku ta kujtojë të birin për atë që ishte – një 8-vjeçar i dashur – dhe jo për mënyrën tragjike se si vdiq.
“Jepuni fëmijëve tuaj një përqafim dhe një puthje më shumë sot,” tha ai. “Ne të duam, Fletcher, dhe ti do të jesh gjithmonë me ne.” Familja shtoi se shpreson të krijojë një fond bursash me emrin e djalit.
Prindërit e Harper Moyski, Michael Moyski dhe Jackie Flavin, thanë në një deklaratë se vajza e tyre “ishte një 10-vjeçare e ndritshme, plot gëzim dhe e dashur thellësisht, buzëqeshja, mirësia dhe shpirti i së cilës prekën këdo që e njohu.”
Familja tregoi se motra më e vogël e Harperit “e adhuronte motrën e saj të madhe dhe tani po përjeton një humbje të paimagjinueshme”.
“Si familje, jemi të thyer, dhe fjalët nuk mund të përshkruajnë thellësinë e dhimbjes sonë,” thanë ata.
Familja shtoi se shpreson që “kujtesa e saj të nxisë veprim” për t’i dhënë fund dhunës me armë.
“Asnjë familje nuk duhet të përjetojë një dhimbje të tillë,” thanë ata. “Ndryshimi është i mundur dhe i domosdoshëm – që historia e Harperit të mos bëhet thjesht një tjetër në një listë të gjatë tragjedish.”
“Drita e Harperit do të ndriçojë gjithmonë përmes nesh, dhe shpresojmë që kujtimi i saj të frymëzojë të tjerët të punojnë për një botë më të sigurt dhe më të dhembshur,” shtuan ata, duke kërkuar privatësi për të “vajtuar, për të mbështetur motrën e Harperit dhe për t’u mbajtur fort pas njëri-tjetrit.”
Mes të plagosurve janë 15 fëmijë të tjerë të shkollës, të moshës 6 deri në 15 vjeç, si dhe tre të moshuar në të 80-at.
Të paktën një viktimë ndodhet ende në gjendje kritike në spital.
Në Minneapolis dhe në qytetin fqinj St. Paul janë mbajtur vigjilje, ndërsa flamujt janë ulur në gjysmështizë.
Të mërkurën, para fillimit të ndeshjes së bejsbollit mes Minnesota Twins dhe Toronto Blue Jays, u mbajt një minutë heshtje në kujtim të viktimave.
Policia ende nuk ka gjetur ndonjë motiv të qartë për sulmin, por thotë se autori ushqente besime ekstremisht antireligjioze dhe kishte ndjekur më parë të njëjtën shkollë.
Nëna e autorit, e cila kishte punuar në shkollë para se të dilte në pension, nuk i është përgjigjur përpjekjeve të organeve të rendit për ta kontaktuar.
