As përpjekja e 12-të për ta zhbllokuar Kuvendin e Kosovës nuk solli rezultat, ndërsa debatet politike po përshkallëzohen. Deputeti i Lëvizjes Vetëvendosje, Hekuran Murati, hodhi poshtë propozimin e Lidhjes Demokratike të Kosovës për një qeveri tranzitore gjithëpërfshirëse, duke e cilësuar atë si jo serioz dhe të papërshtatshëm për rrethanat aktuale.
“Në rastet kur ka luftë civile dhe vendi del nga lufta, krijohet qeveri tranzitore. Por kjo nuk është situata e Kosovës – do të ishte një kthim pas, në vitin 2000,” tha Murati për gazetarët pas mbledhjes së Kuvendit.
Ai paralajmëroi se një qeveri tranzitore do të dërgonte një sinjal të keq te bashkësia ndërkombëtare, duke krijuar perceptimin e një krize të thellë institucionale. Në vend të kësaj, Murati theksoi se zgjedhjet mbeten opsioni i fundit, por se LVV është e gatshme të shkojë në to nëse Kuvendi nuk arrin të zgjedhë një qeveri të re.
“Rezultati zgjedhor ka treguar qartë se kush është fituesi dhe kush duhet të udhëheqë. Vendi ka qeveri dhe pret një qeveri të re – mjafton që Kuvendi të konstituohet përmes votimit të fshehtë,” përfundoi ai.
Ngërçi institucional, që vijon prej disa javësh, ka ngritur shqetësime për stabilitetin politik dhe për funksionimin demokratik të institucioneve të Kosovës. A do të mund të zhbllokohet Kuvendi në përpjekjen e radhës? Kjo mbetet të shihet.
Haxhiu sfidon opozitën: Votimi i fshehtë është thelbi i demokracisë!
Kandidatja e Lëvizjes Vetëvendosje për kryetare të Kuvendit, Albulena Haxhiu, ka reaguar ndaj bojkotit të disa partive parlamentare për emërimin e saj përmes një votimi të fshehtë.
“Për mua është i paqartë qëndrimi i tyre për të mos marrë pjesë në votim për komisionin për votimin e kryetarit në mënyrë të fshehtë. Votimi i fshehtë është shumë demokratik për shumë pozita në Kosovë”, deklaroi Haxhiu për mediat.
Lidhja Demokratike e Kosovës, Partia Demokratike, Aleanca për Ardhmërinë e Kosovës, Nisma dhe Lista Serbe nuk morën pjesë në votimin për ngritjen e një komisioni ad hoc që do të mbikëqyrte procesin e fshehtë të zgjedhjes së kryeparlamentarit.
E pyetur për propozimin e Lumir Abdixhikut për një qeveri tranzitore gjithëpërfshirëse, Haxhiu e hodhi poshtë prerazi këtë ide, duke thënë se “është e papranueshme të injorohet vullneti i qytetarëve”.
Duket se ngërçi institucional në Kosovë po thellohet, ndërsa palët mbeten të ndara mbi mënyrën e zgjidhjes së krizës parlamentare.
LDK ngul këmbë për qeveri tranzitore: “S’jemi të interesuar për pushtet me VV-në”
Hykmete Bajrami nga Lidhja Demokratike e Kosovës deklaroi se partia e saj ende nuk ka marrë përgjigje zyrtare nga shumica e liderëve politikë për propozimin e një qeverie tranzitore gjithëpërfshirëse — përveç Ramush Haradinajt nga Aleanca për Ardhmërinë e Kosovës.
Sipas saj, kjo është “e vetmja zgjidhje për të zhbllokuar procesin politik në vend” dhe LDK nuk ka vënë asnjë kusht paraprak për krijimin e një formule të përbashkët qeverisëse.
“Nuk jemi të interesuar të kemi një qeveri me LVV-në. I kemi ftuar të gjithë dhe i mirëpresim të gjithë. Gjithçka do të jetë subjekt i diskutimit të përbashkët,” tha Bajrami, duke theksuar se kjo iniciativë nuk është shenjë frike politike, por e konsistencës së LDK-së.
Ajo iu përgjigj dhe deklaratës së Ganimete Musliut nga PDK, e cila e akuzoi LDK-në se po shmang marrjen e përgjegjësive: “Nëse do të ishim të interesuar për pushtet, LDK-ja do të ishte në pozitë shumë më të mirë nëse do të bënte koalicion me VV-në,” theksoi Bajrami.
