Mbretëria e Bashkuar ka nisur një program të gjerë përforcimi të kapaciteteve të saj ushtarake dhe strategjike, në një klimë globale gjithnjë e më të pasigurt. Teksa kryeministri Sir Keir Starmer merr pjesë në samitin e NATO-s në Hagë, është konfirmuar se Britania do të blejë 12 avionë luftarakë F35-A, të aftë për të mbajtur bomba bërthamore B-61, në një lëvizje që forcon ndjeshëm kapacitetet goditëse të vendit.
Në të njëjtën kohë, është bërë publike edhe ndërtimi i 12 nëndetëseve të reja sulmuese me energji bërthamore, që do të zëvendësojnë flotën aktuale Astute nga fundi i viteve 2030. Së bashku me këto zhvillime, strategjia e re e sigurisë kombëtare parashikon investime në inteligjencën artificiale, rritjen e rezistencës ndaj kërcënimeve biologjike dhe krijimin e një rrjeti kombëtar bio-laboratorësh me vlerë 1 miliard paund.
Në dokumentin strategjik të publikuar së fundmi, paralajmërohet për herë të parë se Britania duhet të përgatitet për mundësinë e një sulmi të drejtpërdrejtë në territorin e saj, përfshirë edhe skenarë të një konflikti lufte. “Nuk pritet një pushtim nesër – por duhet të marrim seriozisht mbrojtjen e vendit,” tha ministri i Mbrojtjes, John Healey.
Strategjia përmend kërcënimet në rritje nga Rusia, Irani, Koreja e Veriut, si dhe aktivitetet kibernetike dhe sabotuese që tashmë po ndodhin në tokën britanike. Kina përshkruhet si një “kërcënim i sofistikuar dhe i vazhdueshëm”, por qeveria e Starmer thekson se ndërprerja e marrëdhënieve me Pekinin nuk është një opsion, për shkak të rolit ekonomik që Kina luan globalisht.
David Lammy, sekretari i Jashtëm britanik, tha në Parlament se “angazhimi me Kinën është i pashmangshëm”, por theksoi nevojën për të rritur qëndrueshmërinë dhe gatishmërinë përballë kërcënimeve të Pekinit. Ai hodhi poshtë çdo aludim për “marrëveshje të pista” lidhur me ngritjen e një “super-ambasade” kineze në Londër.
Qeveria synon të rrisë shpenzimet për sigurinë kombëtare në 5% të PBB-së deri në vitin 2035, një angazhim historik i shpallur nga Starmer në samitin e NATO-s. Ai ka bërë thirrje për një mobilizim të frymës së “Blitz-it”, duke kërkuar që gjithë shoqëria britanike të bashkohet në mbrojtje të sigurisë kombëtare, ashtu si në kohët më të errëta të Luftës së Dytë Botërore.
