Është ndarë parakohe nga jeta, në moshën 57-vjeçare, mësuesja Leticja Mujo. Arsimtarja, e cila prej vitesh mësonte breza nxënësish në shkollën jo publike “Vinçens Prendushi” në qytet, ka humbur jetën pas një sëmundjeje të rëndë.
Lajmin e hidhur e ka bërë të ditur vetë institucioni arsimor, i cili në një postim në rrjetet sociale shpreh dhimbjen për humbjen e saj.
“Ajo ishte shembull frymëzimi, jo vetëm si mësuese që ndezi dritën e dijes te breza të tërë nxënësish, por edhe si mike e pazëvendësueshme, që dinte të të ngrohte shpirtin me fjalën e mirë dhe buzëqeshjen e saj. Përjetësisht mirënjohës për gjithçka që dhuroi, e përcjellim me dhimbje, por edhe me krenari që patëm fatin ta kishim pranë,”– thuhet ndër të tjera në mesazh.
Shkolla “Vinçens Prendushi” nënvizon se kujtimi, përkushtimi dhe dashuria që ajo shpërndante do të mbeten përgjithmonë të gjalla tek nxënësit dhe kolegët.
