Një bandë adoleshentesh të “egra”, që shquhen për konsumim prosecco-je, po terrorizon lagjen e tyre, ndërsa banorët ecin me frikë nëpër rrugë dhe thonë se janë të pafuqishëm për ta ndalur.

Banorët e Whipton-it, në Exeter, pohojnë se komuniteti i tyre është pushtuar nga një grup me deri në një duzinë vajzash të shkollës, të cilat bëjnë rrëmujë në rrugë, vjedhin në dyqane, thyejnë xhama, çajnë goma makinash dhe sillen në mënyrë ofenduese.

Nxënëset e shkollës, të cilave u është vënë nofka ‘të voglat k****’, janë kapur duke pirë shishe të mëdha alkooli gjatë “aventurave” të tyre nga çatitë.

Të tmerruar për atë që mund të ndodhë, banorët thonë: “Sillemi mirë me to sepse, nëse nuk e bën, të thyejnë xhamat e shtëpisë.”

Policia ka vizituar shpesh zonën, duke kryer dy arrestime dhe duke lëshuar disa urdhra për sjellje antisociale (ASBO). Janë raportuar gjithashtu grafite “të turpshme” dhe abuzime raciste, sipas këshilltares lokale Liz Pole, teksa banorët dhe zyrtarët përpiqen me dëshpërim t’u japin fund trazirave.

Ndërsa kjo mund të duket si sjellje tipike adoleshente, banorët e zemëruar — që nuk guxojnë të flasin publikisht nga frika — i thanë MailOnline se problemi është shumë më i thellë dhe po përkeqësohet çdo ditë.

Shpërthimet e egra janë të përqendruara në rrugët Whipton Village Road dhe Summer Lane. Zona, dikur me reputacion si “Perëndimi i Egër” i Exeter-it për shkak të një pub-i famëkeq për sherrnajë, drogë dhe sjellje intimiduese, duket se po rikthehet në atë gjendje.

Vajzat, thuhet se janë rreth 14 vjeç, e shijojnë kur i ndjek policia ose kur arrestohen, sepse kjo u jep “reputacion rrugësh”, sipas banorëve — ndaj ndërhyrjet policore nuk kanë pasur efekt.

Një punonjës dyqani rrëfeu se banda është sjellë në mënyrë shumë fyese me stafin, dhe se i trembet përshkallëzimit të sjelljes së tyre ndaj fëmijëve të tjerë:

“Një kolegia ime po kalonte me makinë një pasdite dhe iu kërkoi të mos hynin më në dyqan, por ato i bërtitën: ‘Ik qu, ku e q***.’ Sjellje tërësisht e egër. Kam dëgjuar se kanë çarë goma makinash dhe thyer xhama.”

Ai shtoi se kanë dëmtuar pronën:

“Hidhen mbi gardh, hyjnë nga një rrugicë mbrapa, dhe tualetet tona ndodhen jashtë. I kanë rrëmuar tërësisht, lënë mbeturina, shishe prosecco, dhe e kanë shkatërruar brenda — letra higjienike gjithandej.”

“Duhet të pastrojmë çdo mëngjes. Kemi njoftuar policinë, por ata thonë se nuk mund të bëjnë gjë sepse nuk kemi kamera sigurie — kështu që është fjala jonë kundër tyre.”

Një punonjës tjetër i dyqanit i quajti “të voglat k****” që vjedhin hapur nga raftet:

“Kanë vjedhur edhe ilaçe, por ne nuk jemi të autorizuar të ndalojmë hajdutët. Mund të hyjnë e të bëjnë çfarë të duan.”

Ai shtoi:

“Kanë vandalizuar prona, janë ngjitur në çati, madje kanë hyrë edhe në banesën mbi dyqan. I kemi thirrur policisë, por nuk ndodh ndonjë gjë e madhe. Një natë u panë në çatinë e dikujt tjetër. Të gjitha dyqanet përreth janë prekur.”

Një banor tha se njerëzit ecin me frikë nëpër rrugë dhe përpiqen të jenë “në mirëkuptim” me to për të mos u bërë viktimë:

“Thjesht përpiqem të jem në paqe me to. Jemi të sjellshëm sepse përndryshe të thyejnë dritaret. Janë të pacipa nëse ua kërkon. U pëlqen të konfrontohen, ta ndjekë policia.”

“Nuk shkojnë në shkollë dhe disa prej tyre kanë ASBO (urdhra kundër sjelljeve antisociale).”

Një punonjës në një kioskë tha se vajzat hyjnë për të vjedhur dhe bëjnë rrëmujë:

“Hyjnë në ndërtesa pa leje, thyejnë dritare, hedhin gjëra mbi njerëz.”

Grupi i vajzave është bërë temë diskutimi në një grup lokal në Facebook, ku banorët të lodhur i quajnë “kriminele”.

Por edhe familjet e tyre po përballen me këtë sjellje. Motra e njërës prej vajzave reagoi ndaj një komenti për adoleshentet problematike:

“Na falni, por ku keni qenë? Ne e kemi ndjekur motrën time për ta ndalur, por ajo është duke u rebeluar nga vetja. Çfarë të bëjmë kur policia nuk bën asgjë?

“Kemi bërë gjithçka që mund të bëjë një familje normale. Nuk po e duartrokasim në rrugë, por nuk kemi më çfarë të bëjmë. Ndoshta nëse prindërit e tjerë do kishin kontroll, do kishim një shans. Por nuk kanë.”

Deputeti i zonës, Steve Race, deklaroi:

“Banorët e Whipton-it më kanë kontaktuar për të më informuar mbi një valë shqetësuese sjelljesh antisociale. E kuptoj sa shqetësuese dhe përçarëse mund të jetë kjo. Kam kontaktuar me Policinë e Devon dhe Cornwall për të marrë një përditësim mbi hapat që do ndërmarrin. Inkurajoj këdo që dëshmon veprimtari kriminale të raportojë në numrin 101, online ose 999 në raste emergjente.”