Kërkimi i dëshpëruar për një adoleshent që u zhduk teksa po sërfiste ka marrë një kthesë të mrekullueshme, pasi ai u gjet i gjallë në një ishull 13 kilometra larg bregut. Darcy Deefholts, 19 vjeç, u zhduk të mërkurën pasdite pasi doli për të sërfuar pranë One Tree në Wooli, në bregun verior të New South Wales në Australi.

Ai mendohet të ketë qenë duke peshkuar në molin e Wooli-t përpara se të ngjitej me biçikletë rreth pesë kilometra më në veri për të sërfuar, por nuk u kthye më në shtëpi. Babai i tij, Terry Deefholts, bëri një thirrje të dëshpëruar për ndihmë, duke nisur një operacion intensiv kërkimi me vullnetarë dhe shërbimet e emergjencës.

Në rërë u gjetën biçikleta, rrobat dhe këpucët e tij, duke shtuar frikën se mund të kishte pësuar ndonjë fatkeqësi. Por të enjten, autoritetet njoftuan se Darcy ishte gjetur në North Solitary Island, një ishull i largët në det, plot 13 kilometra nga toka.

I ati u shpreh i mbushur me emocione, duke e cilësuar shpëtimin si një “mrekulli një në një milion”. “Nuk kam folur ende me të, jam i tronditur nga gëzimi. Nuk kemi fjetur fare, kemi kaluar shumë”, tha ai për Daily Telegraph.

Darcy ndodhet tani nën kujdes mjekësor, ndërsa komuniteti ka shpërthyer në lot gëzimi. Partnerja e babait të tij, Melissa Smith, tha se kishte frikë se Darcy mund të ishte tërhequr larg nga rrymat, por besonte se ai kishte instinkte të forta për mbijetesë: “Është një djalë i fortë. E dinte që ai ishull ishte një vend i sigurt.”

Gjatë kërkimit, babai i tij u kishte bërë thirrje banorëve të ndihmonin me drone, varka, makina 4×4 dhe avionë. “Kërkoj vetëm një gjë: të gjej djalin tim të dashur të sigurt”, shkroi ai në rrjetet sociale.

Policia e NSW tha se zhdukja e Darcy ishte e pazakontë dhe se telefoni dhe ora inteligjente e tij ishin lënë në shtëpi. Pasditen e së enjtes, ëndrra e familjes përfundoi me një fund të lumtur.

“Faleminderit Zot që arriti deri në Solitary Island,” shkroi një mik familjar. “Darcy, je shumë i dashur. Jemi të gjithë të lumtur që u gjete mirë.”