Për shumë udhëtarë, trolley i pijeve është një nga momentet më të këndshme të një fluturimi të gjatë, por një stjuardesë e njohur ka paralajmëruar për një pije që duhet shmangur me çdo kusht në ajër.

Sue Fogwell, me mbi 22 vite përvojë si pjesë e ekuipazhit të kabinës, i tha Travel + Leisure se Bloody Mary është një zgjedhje e keqe gjatë fluturimit, pavarësisht reputacionit të saj si pije popullore në avion.

Edhe pse lëngu i domates shijon më mirë në lartësi për shkak të ndryshimit të presionit ajror dhe ndjeshmërisë ndaj shijes për ushqime acide dhe të kripura, Fogwell paralajmëron për përmbajtjen tepër të lartë të natriumit (kripës).

“Për shkak të përmbajtjes shumë të lartë të natriumit, gjithmonë e shmang lëngun e domates dhe përzierjet si Mr&Mrs T për Bloody Mary,” tha ajo.

Sipas saj, pijet dhe ushqimet me shumë natrium mund të dehidratojnë shpejt organizmin, sidomos gjatë fluturimeve të gjata, duke e bërë udhëtimin më të lodhshëm. Kjo përkeqësohet edhe nga alkooli në përbërjen e Bloody Mary, që sipas NHS duhet të kufizohet gjatë fluturimeve.

Por ky nuk është i vetmi paralajmërim i Fogwell: ajo shton se asnjëherë nuk pi ujë nga rubineti i avionit, dhe për të njëjtën arsye, as kafe apo çaj, pasi përgatiten me ujë që vjen nga depozitat e brendshme të avionit, të cilat shpesh nuk janë pastruar mjaftueshëm.

Nëse doni të qëndroni të hidratuar dhe të ndiheni mirë gjatë fluturimit, zgjidhja më e mirë është uji i ambalazhuar dhe shmangia e pijeve me shumë kripë dhe alkool.