Inteligjenca artificiale mund të jetë një ndihmës i dobishëm në përditshmëri, por ekspertët paralajmërojnë: kujdes me çfarë ndani. ChatGPT dhe platforma të ngjashme nuk janë vende të sigurta për çdo lloj informacioni, veçanërisht kur bëhet fjalë për të dhëna personale ose konfidenciale.

Sipas Wall Street Journal, vetë kompanitë që kanë ndërtuar këto mjete – përfshirë OpenAI dhe Google – pranojnë rreziqet dhe u kërkojnë përdoruesve të shmangin ndarjen e informacionit të ndjeshëm, pasi bisedat mund të përdoren për trajnimin e modeleve të ardhshme.

5 lloje informacioni që nuk duhet t’ia besoni AI-së:

1. Të dhëna personale identifikuese – Numri i telefonit, adresa e shtëpisë, data e lindjes, ID apo pasaporta nuk duhet të hyjnë në bisedë.
2. Analizat mjekësore dhe historiku shëndetësor – ChatGPT nuk është mjek dhe nuk ruan konfidencialitetin që kërkon informacioni shëndetësor.
3. Të dhënat bankare apo financiare – Numra kartash, llogari bankare apo investime nuk kanë vend në këto platforma.
4. Informacion nga puna – Të dhëna për klientë, projekte të brendshme apo email-e pune nuk duhet të ndahen në asnjë chatbot.
5. Fjalëkalime dhe PIN – Asnjë AI nuk është kasafortë për kredenciale. Mbajini të sigurta dhe përdorni aplikacione të specializuara për këtë.

Në përfundim: Përdorimi i AI mund të jetë i zgjuar – por vetëm nëse përdoruesi është po aq i zgjuar në çfarë zgjedh të ndajë.