Një tifoz i Liverpool-it është përjashtuar nga stadiumi Anfield dhe është arrestuar nga policia, pasi u akuzua për një koment racist ndaj sulmuesit të Bournemouth-it, Antoine Semenyo, gjatë ndeshjes së Premier League të zhvilluar të premten në mbrëmje.

Incidenti ndodhi në minutën e 29-të të ndeshjes, kur Semenyo po përgatitej të kryente një rimëkëmbje nga anësia. Një tifoz në zonën e vendeve të dedikuara për persona me aftësi të kufizuara, sipas dëshmitarëve, i bëri një ofendim racist dhe më pas i hodhi çamçakëz. Semenyo reagoi menjëherë duke i kërkuar ta përsëriste fjalën, për ta denoncuar menjëherë më pas tek gjyqtari kryesor, Anthony Taylor.

Policia e Merseyside arrestoi një 47-vjeçar nga Liverpooli, i cili u akuzua për vepër penale të motivuar nga urrejtja racore. Ai është liruar me kusht, por i është ndaluar hyrja në çdo stadium futbolli në Mbretërinë e Bashkuar dhe ndalohet të afrohet brenda një kilometri nga çdo impiant sportiv.

Një dëshmitar, tifozi Nick Collins, tregoi në rrjete sociale se i dyshuari është një abonent i përhershëm i stadiumit dhe kishte pasur edhe më parë sjellje të pahijshme ndaj zyrtarëve të ndeshjes. “Kur ndodhi episodi, të gjithë u ndjemë në siklet. Ai e kuptoi çfarë kishte bërë vetëm pasi ra heshtja dhe nisi hetimi,” tha Collins.

Pas ndeshjes, ku realizoi dy gola, Antoine Semenyo reagoi me dinjitet në rrjetin X (ish-Twitter):

“Nuk do ta harroj kurrë këtë mbrëmje jo për fjalët e dikujt, por për mbështetjen që mora nga shokët e ekipit, tifozët e Liverpool-it dhe gjithë komuniteti i futbollit.”

Kapiteni i Bournemouth-it, Adam Smith, e quajti incidentin “plotësisht të papranueshëm”, ndërsa klubi i Liverpool-it u zotua të mbështesë hetimet deri në fund, duke deklaruar se racizmi dhe diskriminimi nuk kanë vend as në futboll, as në shoqëri.