Një video tronditëse e publikuar nga mediat australiane ka kapur momentet pas një sulmi të frikshëm nga një peshkaqen ndaj një adoleshenti 16-vjeçar në plazhin Cabarita në bregun verilindor të New South Wales, Australi. Sulmi ndodhi të dielën pasdite, teksa i riu notonte pranë bregut.

Peshkaqeni, i përshkruar si rreth dy metra i gjatë, i shkaktoi lëndime në krahun e djathtë, kyçin e dorës dhe këmbën e djathtë të adoleshentit. Në pamjet filmike, shihet një burrë trim që futet me vrap në ujë dhe godet me grusht peshkaqenin për të shpëtuar të riun, ndërsa plazhistët e tjerë largohen në panik. “O Zot, ai është peshkaqeni!”, dëgjohet një zë në sfond, ndërsa një grua shton e tronditur: “Oh f***, kjo është vërtet e frikshme!”

Adoleshenti u nxor me ndihmën e një dërrase sërfi që u përdor si barrelë dhe u vendos në parkingun pranë, ku dy paramedikë jashtë shërbimit i vendosën një turniket për të ndalur gjakderdhjen. Ai u transportua me helikopter në Spitalin Universitar të Gold Coast dhe ndodhet në gjendje serioze por të qëndrueshme.

Paramediku Ben Mumford përgëzoi guximin e njerëzve që ndihmuan, duke thënë: “Pati disa persona shumë të guximshëm që hynë në ujë dhe e ndihmuan djalin.” Ndërkohë, një helikopter i dytë u ngrit për të kërkuar peshkaqenin, por pa sukses. Nuk dihet ende se çfarë specie ishte peshkaqeni agresor, megjithëse një peshkaqen tigër ishte shënuar dhe lëshuar në të njëjtin plazh vetëm tre ditë më parë.

Autoritetet kanë mbyllur përkohësisht plazhin Cabarita, ndërsa vijojnë hetimet për incidentin.