Një tjetër ironi e hidhur shqiptare u vulos sot me shembjen e kompleksit “Saint Michelle Residence” në Shetaj të Ishmit, pronë e ish-kryeinspektorit të IMT-së në Durrës, Ardian Halili. Forcat xheniere kryen shpërthimin e kontrolluar të godinës 2-katëshe, ndërsa objektet e tjera më të vogla u rrëzuan me fadromë. Resorti, me vila, pishinë e restorant, ishte ndërtuar pa asnjë leje pranë Kepit të Rodonit, në një nga zonat më të lakmuara bregdetare të vendit.

Rasti i Halilit, i cili gjatë viteve 2017-2021 drejtonte strukturën që duhej të ndalonte ndërtimet e paligjshme, është kthyer në simbol të paradoksit shqiptar: ai që duhej të shembte, ndërtoi vetë. Për më tepër, për tetë vite kompleksi funksionoi lirisht, ndërsa vetë Halili shfaqej në rrjete sociale duke promovuar restorantin dhe peshkun e freskët të resortit të tij. Arrestimi i tij dhe shembja e resortit nënvizojnë aksionin e qeverisë për prishjen e ndërtimeve abuzive, por ngre një pyetje të madhe publike: si është e mundur që një shkelje kaq e dukshme të mbijetonte për kaq gjatë nën sytë e institucioneve?