Pas një mungese të gjatë që la një boshllëk në muzikën pop, Ariana Grande surprizon fansat me lajmin e shumëpritur.

Verën e ardhshme ylli i pop-it nis turneun e saj më të ri, “The Eternal Sunshine Tour”. Pesë net të zjarrta në Londër janë, deri tani, të vetmet koncerte të konfirmuara jashtë Amerikës së Veriut, duke e kthyer këtë rikthim në një nga ngjarjet më të mëdha muzikore të vitit 2026.

Turneu mban emrin e albumit të saj të fundit, “Eternal Sunshine”, i publikuar në mars të vitit 2024. Që prej atëherë, Grande ka qenë më aktive në kinematografi, ku ka shkëlqyer me rolin e Glindës në filmin Wicked, performancë që i solli një nominim për çmimin Oscar. Vazhdimi i filmit, Wicked: For Good, pritet të publikohet në nëntor të këtij viti.

Turneu do të nisë më 6 qershor 2026, në Oakland të Kalifornisë, dhe do të përfundojë me pesë net madhështore në O2 Arena të Londrës, më 15, 16, 19, 20 dhe 23 gusht. Shitja paraprake e biletave për Mbretërinë e Bashkuar nis më 16 shtator, ndërsa shitja e përgjithshme më 18 shtator.

Kjo do të jetë hera e parë që Ariana Grande ngjitet në skenë me koncerte të plota që nga Sweetener World Tour në vitin 2019. Në vitet e fundit, ajo i është përkushtuar kinemasë, me projekte të reja në horizont, përfshirë edhe një rol në filmin e katërt të sagës Meet the Parents.

Megjithatë, këngëtarja nuk e ka harruar muzikën. Në korrik, u premtoi fansave një surprizë dhe ja ur ndodhi…

“Shumë e gabuar të mendoni se vetëm pse jam e zënë me shumë projekte, kam ndërmend të braktis muzikën…!!! Muzika ka qenë dhe mbetet shpëtimi im. Duhet të ketë vend për gjithçka. Ndoshta nuk do të duket si më parë, por më pëlqen më shumë tani. Po argëtohem. Ndihem mirënjohëse, e emocionuar dhe e frymëzuar”, shkroi Ariana Grande në atë kohë ‘Instagram’.

Turneu do të ndalet gjithashtu për katër net në Los Angeles dhe katër në Brooklyn, me koncerte të tjera të planifikuara në Austin, Sunrise (pranë Fort Lauderdale), Atlanta, Boston, Montreal dhe Chicago.

Deri tani, nuk janë njoftuar data të tjera në qytete të Mbretërisë së Bashkuar apo në vende të tjera të Evropës.

Kujtojmë se në vitin 2017, koncerti i saj në Manchester, pjesë e turneut Dangerous Woman Tour, u shënua nga një sulm vetëvrasës tragjik, ku humbën jetën 22 persona. Ariana është rikthyer në qytet që prej atëherë, për një koncert bamirësie vetëm dy javë më pas dhe më vonë si kryeartiste në Manchester Pride në vitin 2019.