ROMË – Një incident i pazakontë në metronë e Romës ka marrë një kthesë të papritur dhe paqësore, pasi një grup turistësh nga Meksika u përgjigjën me muzikë ndaj ngacmimeve të një banori vendas të irrituar.
Pamjet e publikuara në rrjet tregojnë italianin e zemëruar duke bërtitur e duke goditur me këmbë drejt grupit të turistëve të rinj në platformë, ndërsa rojet e sigurisë përpiqeshin ta qetësonin. Burri pretendonte se po vonohej për punë, ndërsa turma e të rinjve, të qetë dhe të buzëqeshur, vendosi të ndizte në altoparlant këngën legjendare të John Lennon, Imagine, simbol i paqes dhe unitetit.
Turistët nisën të këndonin e të valëvitnin duart në ajër, dhe kur arriti refreni, i gjithë grupi këndonte në kor. Madje një nga rojet iu bashkua, duke e shndërruar tensionin në një moment të rrallë solidariteti.
Megjithatë, italiani nuk u impresionua dhe vazhdoi të godiste me këmbë nga dera e vagonit. Turistët kishin mbërritur në kryeqytetin italian për Jubileun e të Rinjve 2025, një event vjetor katolik i organizuar nga Vatikani, i cili këtë verë ka sjellë qindra mijëra pelegrinë dhe ka shkaktuar vonesa të shumta në transportin publik të qytetit.
Videoja ka marrë mbi 3.2 milionë shikime në TikTok, duke nxitur reagime të përziera – disa e kanë quajtur “një leksion të madh jete”, ndërsa të tjerë kanë shprehur mirëkuptim për nervozizmin e vendasit për shkak të kaosit në metro gjatë sezonit turistik.
