Një makinë ka përplasur një turmë të madhe tifozësh futbolli përpara ndeshjes derbi mes Barcelonës dhe Espanyol-it, duke shkaktuar panik dhe kaos pranë stadiumit RCDE, në periferi të Barcelonës.

Pamjet tronditëse tregojnë momentin kur një automjet i bardhë përplaset me dhjetëra tifozë që ishin mbledhur për të pritur autobusin e ekipit të Espanyol-it. Incidenti ndodhi pak para ndeshjes ndaj Barcelonës, që më vonë u kurorëzua kampione e La Ligës me fitoren 2-0 ndaj rivalëve lokalë.

Sipas mediave spanjolle, 15 persona kanë mbetur të plagosur si pasojë e ngjarjes, e cila është nën hetim nga autoritetet.

Policia katalanase dyshon se nuk bëhet fjalë për një sulm të qëllimshëm. Sipas raportimeve, drejtuesja e mjetit është një grua, e cila dyshohet se humbi kontrollin e makinës. Ajo është arrestuar nga autoritetet, raportoi “Marca”.

Fatmirësisht, lëndimet nuk mendohet të jenë të rënda. Shtatë ambulanca mbërritën menjëherë në vendngjarje për të ndihmuar të plagosurit, disa prej të cilëve u transportuan në spital.

Pamjet nga vendi i ngjarjes tregojnë tifozë të mbetur të bllokuar, të tjerë me fytyra të përgjakura dhe në lot, ndërsa makina përplaset në mes të turmës. Një moment dramatik tregon automjetin e bardhë teksa përballet me turmën, ndërsa tifozët e qëllojnë me shishe dhe pije.

Më pas makina përshpejton dhe futet mes turmës, duke shkaktuar panik të menjëhershëm dhe tërbim. Policia e armatosur vrapon drejt automjetit pasi ai përplaset me njerëzit.

Gjatë ndeshjes, klubi i Espanyol-it lëshoi një njoftim në stadium duke sqaruar se incidenti ishte nën kontroll dhe lëndimet nuk ishin serioze.

Ngjarja ka tronditur tifozët dhe komunitetin sportiv spanjoll, ndërsa hetimet për zbardhjen e plotë të rrethanave janë në vijim.