Pamjet tronditëse nga kamerat e sigurisë tregojnë momentin horror kur një adoleshent që ecte në trotuar u përplas dhe u vra nga një makinë Audi në një aksident të tipit “godit dhe ik” që ndodhi dje.

Ngjarja, e cila ndodhi në mes të ditës, tregoi një makinë gri që duket se devijon drejt një grupi me biçikleta elektrike përpara se të shtypë djalin ndërsa ecte në trotuar.

16-vjeçari u dërgua me urgjencë në spital, por ndërroi jetë nga plagët e marra. Një 18-vjeçar me biçikletë elektrike, i cili u përplas gjithashtu nga automjeti, ndodhet ende në luftë për jetën.

Ngjarja ndodhi dje në Sheffield dhe ka nisur një operacion kërkimi për gjetjen e drejtuesit të mjetit, i cili është ende në arrati.

Policia e South Yorkshire ka arrestuar një burrë dhe një grua, të dy në të 40-at, nën dyshimin për ndihmë ndaj një të dyshuari dhe po mbahen në paraburgim, ndërsa policia apelon për dëshmitarë, pamje filmike ose çdo informacion tjetër mbi aksidentin.

Një video e shpërndarë në internet tregon dy çiklistë me biçikleta elektrike dhe një motorist që po lëviznin në rrugë, kur një Audi gri që vinte nga drejtimi i kundërt duket se devijon drejt tyre.

Në pamjet e rënda, motoristi shmang makinën për pak, ndërsa një nga çiklistët goditet drejtpërdrejt dhe fluturon në ajër për t’u përplasur në gardhin e një shtëpie.

Më pak se një sekondë më vonë, makina vazhdon për rreth 25 metra dhe përplas 16-vjeçarin që sapo kishte ndaluar për një moment në trotuarin e rrugës Barnardiston, para se të ngrinte dorën në ajër. Një tjetër çiklist, që shpëton për pak, duket se mbetet i shokuar ndërsa drejtuesi i makinës largohet nga vendi i ngjarjes.

Pas tmerrit, Audi shfaqet duke u larguar me dëme të mëdha në pjesën e përparme të makinës, veçanërisht në harkun e gomës.

Pamje të tjera tregojnë se makina është kthyer sërish në vendngjarje, këtë herë duke lëvizur në drejtim të kundërt me pjesën e përparme të dëmtuar rëndë.

Pas aksidentit, copa të makinës dhe biçikletës elektrike shiheshin të shpërndara nëpër rrugë.

Një perimetër sigurie është vendosur në rrugën Staniforth, ku po vazhdojnë hetimet forensike.

Kushdo që ka informacion, u kërkohet të kontaktojë në numrin 101, duke cituar numrin e incidentit 630 të datës 4 qershor 2025.

Lauren, 31 vjeçe, e cila nuk dëshiron të bëjë publik mbiemrin e saj, tha se i dha ndihmën e parë adoleshentit, duke i bërë CPR dhe duke thirrur për ndihmë.

Ajo tha: “Nuk dua të hyj në detaje, ishte traumatike – një djalë i ri, i bukur, ka humbur jetën në diçka ku as nuk ishte i përfshirë.”

Ish-këshilltari lokal Mazher Iqbal, 52 vjeç, tha se kishte ndihmuar për t’i dhënë CPR 16-vjeçarit pas aksidentit, i cili ndodhi pak para orës 17:00.

Ai tha: “Ndodhi brenda sekondash, ishte vërtet tronditëse – nuk kisha parë kurrë diçka të tillë më parë.

Kisha parë lajmet nga Liverpool dhe vende të tjera në Europë, por ta shohësh me sytë e tu, është vërtet tronditëse.”

Ai shtoi: “Menduam se do të kthehej sërish kur bëri një kthesë të shpejtë – menduam se do ta godiste përsëri.

Dukej qartë sikur po i shënjestronte çiklistët.”

Shefi i hetimeve, DCI Andy Knowles, tha: “E dimë se ky incident ka shkaktuar shqetësim të madh në komunitetin lokal, dhe mendimet tona janë me të afërmit e djalit pas kësaj tragjedie.

Hetimi ynë po ecën me ritëm të shpejtë dhe kemi ende një skenë të siguruar në rrugën Staniforth ndërsa përpiqemi të zbulojmë rrethanat e ngjarjes.

Nëse keni ndonjë video, imazh ose informacion që mund të ndihmojë në hetimin tonë, ju lutem ndajeni me ne – mund të jetë pjesë kyçe e zbardhjes së kësaj ngjarjeje.”