Reperja e njohur Cardi B është paraqitur këtë javë në gjykatën civile të Los Angeles për të dëshmuar lidhur me një përplasje që ndodhi në vitin 2018 mes saj dhe një roje sigurie, Emani Ellis, në një klinikë në Beverly Hills.

Ellis ka paditur yllin e muzikës për sulm fizik, te pështyra dhe prerje në fytyrë me thonjtë e gjatë, duke pretenduar se ngjarja ndodhi ndërsa Cardi ishte shtatzënë me fëmijën e saj të parë. Ngjarja ndodhi para se artistja të bënte publike shtatzëninë.

Cardi, emri i vërtetë i së cilës është Belcalis Almánzar, mohoi çdo përfshirje fizike në incident, duke thënë se ishte vetëm një përplasje verbale. “Isha shumë e shqetësuar, jo e zemëruar. Isha shtatzënë dhe kjo grua po më ndiqte e po më filmonte në një ambient privat,” tha ajo në gjyq.

Dëshmia e Cardi B është bërë virale për shkak të reagimeve sarkastike, mimikave të ekzagjeruara dhe batutave spontane që kanë bërë sallën e gjyqit të shpërthejë në të qeshura. Një nga momentet më të shpërndara ishte kur avokati e pyeti nëse flokët e saj ishin të sajat apo një paruke, dhe Cardi qeshi duke u përgjigjur: “Janë paruke.”

E pyetur nëse ishte “e paaftë” në atë kohë, Cardi tha me ironi: “Kur je shtatzënë, je shumë e paaftë. Do të të tregoj çfarë nuk mund të bëja?”. Ajo gjithashtu theksoi se nuk do të mund ta godiste rojen edhe sikur të donte, sepse ishte “dyfishi i saj”.

Në një tjetër moment qesharak, Cardi reagoi ndaj pyetjeve të avokatit:
“Jam shtatzënë dhe kjo vajzë është gati të më rrahë. Hello?”
“Hello. Jam këtu,” u përgjigj avokati me nervozizëm, ndërsa salla shpërtheu në të qeshura.

Ellis gjithashtu pretendon se është ofenduar për shkak të peshës dhe racës së saj akuza të cilat Cardi i ka mohuar kategorikisht në sallë.

Cardi deklaroi: “Nuk e kam goditur, nuk më ka goditur. Nuk pati prekje. Nuk kishte incident fizik.”

Dokumentet e gjyqit gjithashtu përmendin se Cardi mund të ketë ndikuar në largimin e rojes nga puna, por përfaqësuesit e klinikës kanë sqaruar se ishte vendim i stafit mjekësor për shkak të shkeljes së privatësisë.

Ndërkohë, gjyqi aktual është duke vazhduar dhe po komentohet gjerësisht online si një “reality show në sallën e gjyqit”, ku ndjekësit nuk po humbasin asnjë moment.