Një investitor britanik milioner, Paul Gerard Tustain, ka ndërruar jetë në një aksident tragjik me motor në veri të Spanjës, teksa po udhëtonte me vajzën e tij. 62-vjeçari, themelues i platformës së famshme BullionVault, u përplas kokë më kokë me një furgon pasi motoçikleta e tij BMW me qira doli në krahun e gabuar të rrugës, në afërsi të qytetit Pamplona.
Aksidenti ndodhi para syve të vajzës
Të dy – babë e bijë – po udhëtonin me motorë të ndarë drejt qytetit Logroño, kur ndodhi përplasja në rrugën NA-1110, në zonën Iguzquiza, rreth orës 13:30 të ditës së enjte.
Një zëdhënës i policisë lokale deklaroi:
“Vajza e tij e pa që kishte dalë në krahun e gabuar të rrugës dhe u përpoq ta paralajmëronte me shenja me dorë, por ishte tepër vonë. Përplasja me furgonin ishte brutale. Shoferi i furgonit nuk mund të bënte asgjë për ta shmangur.”
Hetimet po shqyrtojnë nëse Tustain mund të ketë pësuar një problem shëndetësor para aksidentit, ose nëse ishte thjesht një distraktim fatal.
Ndihma mjekësore nuk arriti ta shpëtojë
Pavarësisht mbërritjes së menjëhershme të ambulancave, helikopterit mjekësor dhe zjarrfikësve, Tustain ndërroi jetë në vendngjarje. Trupi i tij është dërguar në Institutin e Mjekësisë Ligjore të Navarrës për autopsi.
Fotot nga vendi i aksidentit tregojnë motorin e rrëzuar në mes të rrugës dhe një furgon të bardhë me pjesën e përparme të dëmtuar rëndë.
Zëdhënës i zjarrfikësve tha:
“Përplasja kokë më kokë ndodhi mes një motorri dhe një furgoni. Motociklisti ndërroi jetë. Pasagjerët e furgonit janë në gjendje të mirë.”
Një figurë e njohur në botën e investimeve
Paul Tustain ishte një sipërmarrës nga Londra, i njohur si themelues dhe kryetar i BullionVault – platforma më e madhe në botë për investime në ar online – dhe i WhiskyInvestDirect, që merret me investime në skoce të pjekur në fuçi.
Ai kishte krijuar më herët edhe kompaninë SAM Systems, që ofronte zgjidhje teknologjike për sektorin bankar dhe bursier.
Tustain u fut në tregun e arit në fillim të viteve 2000, pas vendimit të diskutueshëm të ish-kancelarit britanik Gordon Brown për të shitur rezervat e arit të Britanisë. Në një intervistë të vitit 2016 për The Times, ai kishte thënë:
“Ai idiot shiste ar çdo dy javë, aq shumë sa e rrënoi çmimin. Unë bleva tre prej atyre shufrave të mëdha të arit – si ato që tund James Bond. Mbase ishte blerja më e mirë që kam bërë ndonjëherë.”
Ai mblodhi 275,000 £ nga 30 investitorë familjarë dhe ‘angel investors’ për të krijuar BullionVault, ku njerëzit mund të blinin pjesë të vogla në shufra ari. Dhjetë vjet më vonë, platforma administronte mbi 1.3 miliardë dollarë në ar, ekuivalent me rreth 11% të rezervave të Thesarit Britanik, dhe gjeneronte afro 4 milionë paund fitim para taksave.
Reagime pas vdekjes së tij
Një punonjës i BullionVault deklaroi sot:
“Jemi në shok nga vdekja e papritur e Paul-it. Do të japim një deklaratë zyrtare në kohën e duhur, por aktualisht jemi ende në proces zie. Mendimet tona janë me familjen e tij.”
