Aktori i njohur Eric Stonestreet, i dashur për publikun nga roli i tij si Cameron në serialin Modern Family, ka komentuar lidhjen pothuajse dyvjeçare mes mikut të tij të ngushtë Travis Kelce dhe këngëtares Taylor Swift. Në premierën e serialit Dexter: Resurrection, Stonestreet u shpreh për Page Six se e njihte prej kohësh yllin e Kansas City Chiefs dhe ishte “shumë i lumtur” kur ai nisi të dilte me Swift, duke shtuar se këngëtarja “e meriton një djalë të mirë” dhe se Kelce është pikërisht i tillë.

Stonestreet, i cili e ndjek prej vitesh skuadrën e Chiefs dhe ka njohje të mëparshme me Taylor Swift, tha se lidhja e tyre i duket një përputhje perfekte. Swift konfirmoi romancën me Kelce në shtator 2023, pas disa muajsh takimesh larg syrit të publikut. Prej atëherë, ajo ka ndjekur mbi 20 ndeshje të NFL për të mbështetur partnerin e saj, përfshirë finalen e Super Bowl në Shkurt. Aktori shtoi me humor se nuk e di nëse do ftohet në një dasmë të mundshme, por shprehu dashurinë dhe mbështetjen për të dy, duke theksuar: “Jam krenar për këtë lidhje dhe për mënyrën si po e përjetojnë publikisht.”