Kancelari Friedrich Merz takohet me presidentin Trump për herë të parë si Kancelar në Uashington të enjten. Çfarë mund të pritet nga kjo vizitë? Entuziazmi për miken e madhe, SHBA me ardhjen e Donald Trump në Shtëpinë e Bardhë ka rënë në Gjermani. Me deklaratat e tij Trump e ka tronditur ndjenjën e sigurisë së gjermanëve tek SHBA. Deklaratat e tij mbi konfliktin në Ukrainë, kërcënimet vazhdueshme ndaj BE me tarifat ndëshkuese i sjellin shumë shqetësime Brukselit dhe qeverisë gjermane. E pikërisht në kohë të tilla të trazuara, kur flitet në media edhe për fundin e marrëdhënies transatlantike, shkon në SHBA një transatlantik i bindur si Friedrich Merz. Të enjten (05.06.) Merz zhvillon vizitën e parë si kancelar në SHBA dhe takohet me Trump në Shtëpinë e Bardhë.
Mediat gjermane janë shumë të përmbajtura në vlerësimet e tyre. “Vizitat në SHBA kanë qenë gjithmonë një sfidë për kancelarët federalë, sepse gjërat trajtohen ndryshe në qendrën e fuqisë botërore sesa në provincën gjermane. Në këtë drejtim, Merz mund të jetë shumë i gëzuar nëse e kalon vizitën e punës me Trump pa ndonjë lëndim të dukshëm”, shkruan “Rhein-Neckar Zeitung.
Pavarësimi projekt i së ardhmes, Evropa ende nuk mundet pa SHBA
Megjithë deklaratat e Trump kundër Evropës, Evropa ka nevojë për SHBA-në ende, sidomos në çështjet e sigurisë. Megjithatë kancelari gjerman ka bërë të qartë, se e ka në fokus pavarësinë e Evropës e Gjermanisë nga SHBA. Deklarata e tij pas fitores në zgjedhje bëri bujë, kur tha, se pavarësimi nga SHBA do të jetë “prioritet absolut” i tij po ashtu edhe forcimi i Evropës. Natën e zgjedhjeve që pas daljes së parashikimeve të para Merz u shpreh se: “Të paktën që nga deklaratat e Trump një javë më parë, është e qartë se kjo pjesë e amerikanëve është kryesisht indiferente ndaj fatit të Evropës.” Kjo deklaratë u bë pas skandalit në Zyrën Ovale, kur Trump u përplas me presidentin ukrainas, Zelenski para kamerave.
Nuk duhet të kenë qenë e lehtë për Merz që njihet si transatlantik i bindur të japë deklarata të tilla. “Tagesschau” analizon marrëdhënien e Friedrich Merz me SHBA, për të cilin një ndër garancitë me të cilat është rritur është se “Shtetet e Bashkuara – ky shtet i fuqishëm në anën tjetër të Atlantikut – janë një partner i ngushtë, madje një mik i Gjermanisë. Gjatë gjithë jetës së tij, Merz ka jetuar këtë marrëdhënie të veçantë gjermano-amerikane, qoftë si përfaqësues biznesi, por edhe si kryetar i Urës së Atlantikut dhe, jo më pak e rëndësishme, edhe si politikan në role të ndryshme.”Kjo pritet të reflektohet edhe në vizitën e Merz në Uashington, sipas mediave gjermane. Tre tema ka të ngjarë të dominojnë vizitën e parë të transatlantikut Friedrich Merz si kancelar: mosmarrëveshja mbi tarifat që kërcënon Trumpi, lufta ruse kundër Ukrainës dhe diskutimi lidhur me shpenzimet e NATO-s.
Rritja e shpenzimeve ushtarake të Gjermanisë
Të paktën kur bëhet fjalë për shpenzimet e NATO-s, Gjermania po bën hapa të mëdhenj drejt përmbushjes së kërkesave të Trump. Gjermania është në rrugën e duhur për të bërë më shumë, tha Merz. Konkretisht, 3.5 përqind e produktit të brendshëm bruto do të shpenzohet për ushtrinë dhe një 1.5 përqind shtesë për infrastrukturën e nevojshme. Gjithsej qindra miliardë euro. Ky hap i Gjermanisë ndoshta ndihmon për të folur për mbështetjen e Ukrainës tek Trump. Në këtë pikë qeveria amerikane i shkakton shumë kokëçarje evropianëve. Trump e ndryshon herë pas here qëndrimin e tij. Në një moment e kërcënon Ukrainën, në momentin tjetër papritmas fyen Putinin, duke thënë se ai po vret shumë njerëz dhe nuk ka idenë se çfarë dreqin po bën Putini. Këto fjali u japin shpresë evropianëve. Por gazeta gjermane “Handelsblatt” që analizon vizitën e Merz në SHBA prapë e këshillon Merz, se “pas një përshëndoshjeje miqësore në Shtëpinë e Bardhë, fokusi i Merz duhet të vazhdojë të jetë forcimi i pavarësisë së Evropës.”
Nga perspektiva e qeverisë gjermane, do të ishte në këto kushte sukses që në një farë mënyre Trump të qëndronte në kursin pro-ukrainas, shkruan “Tagesschau.”
Grindja për tarifat
Sikur të mos mjaftojë që gjithçka është e komplikuar këto kohë, shtohet edhe çështja e tarifave. Trump thotë se kjo është fjala e tij e preferuar. Ai e kërcënon vazhdimisht Evropën me pagesa ndëshkuese të rënda, një makth për Gjermaninë, që njihet si një komb eksportues. Friedrich Merz dëshiron të prezantohet me vetëbesim në këtë çështje, në fund të fundit, ai përfaqëson ekonominë e tretë më të madhe në botë. Dhe në të vërtetë, Evropa nuk është duarbosh në këtë mosmarrëveshje. Një levë e mundshme mund të jenë taksat më të larta mbi gjigantët e teknologjisë nga Silicon Valley.
Vetë Merz e konsideron rezultatin e mosmarrëveshjes mbi tarifat të pasigurt. Mund të ndodhë që gjërat të mos zgjidhen, tha ai disa ditë më parë në Berlin. Atëherë Evropa do të duhet të vendosë se sa konkurruese dëshiron të jetë. “Nëse është e nevojshme, edhe pa Amerikën” – një frazë tjetër që Merz ndoshta nuk mund ta kishte imagjinuar më parë.
Kushdo që ndjek qasjen e Trump e di se një paraqitje e përbashkët në Zyrën Ovale vështirë të planifikohet. Edhe detajet më të vogla mund ta bëjnë presidentin amerikan të zemërohet dhe të shfryjë zemërimin. Thuhet se Friedrich Merz është përgatitur intensivisht për takimin.
