Dy stuhi tropikale kanë goditur brigjet e Meksikës duke shkaktuar alarme për përmbytje dhe mot ekstrem. Stuhia tropikale Barry u formua të dielën pranë bregdetit juglindor dhe po afrohet me shpejtësi drejt tokës, duke sjellë erëra me shpejtësi deri në 65 km/h. Qendra e saj ndodhet pranë Tuxpanit dhe Tampicos, ndërsa paralajmërimet për stuhi janë dhënë për zonat nga Boca de Catan deri në Tecolutla. Barry pritet të sjellë deri në 25 centimetra reshje në Veracruz, San Luis Potosi dhe Tamaulipas, duke rrezikuar përmbytje të mëdha për disa ditë.
Ndërkohë, Flossie, një tjetër stuhi tropikale, është formuar në brigjet jugperëndimore të Meksikës dhe po lëviz në drejtim të perëndimit me potencial për t’u shndërruar në uragan deri të martën. Me qendër pranë Acapulcos dhe shpejtësi të ngjashme erërash si Barry, Flossie pritet të sjellë reshje intensive deri në 25 centimetra në shtetet Oaxaca, Guerrero, Michoacán, Colima dhe Jalisco. Autoritetet kanë shpallur paralajmërime të gjera për komunitetet bregdetare dhe kërkojnë vigjilencë për shkak të rrezikut të përmbytjeve dhe rrëshqitjeve të dheut.
