Conor McGregor është parë për herë të parë që nga momenti kur goditi një të pranishëm në klubin e famshëm “Pacha” në Ibiza të martën në mëngjes. Luftëtari i turpëruar u filmua duke qëlluar një person në pistën e vallëzimit, në orën 05:53 të mëngjesit, ndërsa muzika vazhdonte me zhurmë, pasi kishte pirë deri në orët e para të mëngjesit në ishullin spanjoll të festave.
Në pamje, McGregor, 36 vjeç, shihet duke folur me burrin për disa sekonda, e më pas i hedh krahun mbi supe dhe e godet me dorën e majtë – ndërsa në dorën e djathtë mban një gotë alkooli. Pas pak sekondash, ai e godet sërish, duke e lënë burrin në tokë. I veshur me pantallona të bardha të ngushta dhe këmishë bardh e zi, McGregor – ish-kampion në peshat e lehta dhe pendël – nuk ka luftuar që prej vitit 2021 dhe u mbrojt nga viktima e tij nga shoqëruesit e tij.
Tani, ai është parë duke u relaksuar në një jaht në Ibiza me të fejuarën Dee Devlin, ndonëse me një shenjë të dukshme në sy. Çifti, që janë të lidhur që nga viti 2008, u fejua në gusht 2020 kur McGregor i propozoi gjatë ditëlindjes së tij në jug të Francës. Këtë javë, dashuria e tyre u shfaq hapur – McGregor u pa duke e përqafuar dhe puthur në qafë Devlinin, ndërsa më pas ata kërcyen dhe ndanë puthje në marinë.
McGregor, i zhveshur në pjesën e sipërme, dukej se kishte një shenjë të kuqe në fytyrë pas incidentit të mesjavës. Sipas raportimeve, ai u lejua të vazhdonte festën, ndërsa viktima e goditur u nxorr jashtë nga lokali. Një dëshmitar për The Sun tha: “Duket se dikush i ka thënë diçka që e ka acaruar dhe ai ka reaguar shumë keq. Personi ra në tokë, dhe shokët e tij e ndihmuan për t’u larguar. Nuk pati pasoja për Conor, por personi që ai goditi u largua dhe nuk e pashë më.”
Sherri ndodhi vetëm pak orë pasi McGregor u pa duke festuar me Katie Price në klubin “O Beach” të Wayne Lineker. Ai mbante pantallona të kuqe, kapele dhe syze dielli, duke pirë puro dhe argëtuar turmën gjatë një feste të çmendur në ditë. Katie Price ndau një foto me të në Instagram, me mbishkrimin: “Ti je një legjendë,” ndërsa McGregor e kishte etiketuar në “story”-n e tij me fjalën: “Përgjithmonë.”
Edhe mbrojtësi i Tottenham, Kevin Danso, postoi një foto me McGregorin. Ndërkohë, Wayne Lineker shprehu zhgënjimin e tij ndaj McGregorit për incidentin, duke zbuluar identitetin e viktimës: një punonjës i tij i quajtur Joe Gomez. Ai shkroi: “Ky është një mik shumë i afërt i imi që ka punuar në Ocean për tetë vite. Ka një zemër të veçantë dhe në gjithë këto vite nuk e kam dëgjuar asnjëherë të ngrejë zërin. Ai mori dy grushte nga Conor McGregor në Pacha pa asnjë arsye. Ju prezantoj me Joe Gooomez (sic). I mori grushtet si kampion.”
Lineker shtoi: “Kam fshirë postimin tim me Conor nga Ocean të dielën. Të thuash që jam i zhgënjyer është pak. Ne në Ocean Beach Ibiza gjithmonë do të vendosim familjen të parën. #nejemifamilje.”
