Një rrethim i godinës te News24 , e cila u shoqërua me ndërprerjen e sinjalit të News24 dhe puna e BalkanWeb, Gazetës Panorama dhe Gazetës Shqiptare u paralizua. Avokati i “Fokus Media News”, Erjon Kanxheri, akuzon hapur kompaninë Kayo sh.a, të drejtuar nga Ardi Veliu, dhe Policinë e Shtetit për veprime “tërësisht të paligjshme, arbitrare dhe që përbëjnë vepër penale”.
Sipas tij, nuk ekziston asnjë vendim gjyqësor për lirimin e godinës dhe asnjë përmbarues nuk është i përfshirë, çka e bën ndërhyrjen e forcave policore “një akt të dhunshëm dhe të jashtëligjshëm”. “Ky është një abuzim flagrant me ligjin. Forcat e rendit mund të veprojnë vetëm në mbështetje të përmbaruesit, jo duke kryer rrethime të natës me metoda presioni ndaj medias,” deklaroi Kanxheri. Avokati denoncoi faktin se gjithçka është zhvilluar në një ditë pushimi dhe në orët e natës, duke shfrytëzuar mbylljen e gjykatave për të shmangur çdo reagim institucional. Ai paralajmëroi se do të ndjekë të gjitha rrugët ligjore për të ndëshkuar këto veprime, të cilat i cilësoi si një sulm të drejtpërdrejtë ndaj lirisë së medias dhe të drejtës së publikut për informim.
Kjo ngjarje po konsiderohet si një nga goditjet më të rënda ndaj medias së lirë në vitet e fundit, duke ndezur alarmin për gjendjen e demokracisë në vend. Këto pretendime i hedh poshtë ministria, e cila dha këtë deklarat për shtyp:
DEKLARATË PËR SHTYP:
Ministria e Ekonomisë, Kulturës dhe Inovacionit , në vijim të interesit të lartë publik dhe për sqarimin e opinionit mbi pretendimet e paraqitura nga Shoqëria “Fokus Media News” lidhur me të ashtuquajturën vazhdimësi të kontratës së qirasë deri në vitin 2033, bën me dije sa vijon: Pretendimi i shoqërisë se kontrata e saj e qirasë ka afat deri në vitin 2033 lidhet me një pasuri tjetër shtetërore, e ndryshme dhe pa asnjë lidhje juridike apo faktike me pasurinë e kaluar shoqërisë shtetërore “KAYO” sh.a.
Pasuria në fjalë është gjithashtu në pronësi të shtetit dhe ndodhet në zonën kadastrale nr. 8170, pasuria nr. 10/304, me sipërfaqe trualli 13,922 m², pranë ish-“Uzinës së Pjesëve të Këmbimit të Automjeteve” në Shkozë. Për këtë pronë ekziston një tjeter kontratë qiraje e lidhur në vitin 2013 dhe e ndryshuar me aneks në vitin 2016 ndërmjet MFE, sot Ministrisë së Ekonomisë, Kulturës dhe Inovacionit dhe Shoqërisë Panorama Group Sha. me kohëzgjatje deri në 2033. Në dallim nga kjo, pasuria që i është kaluar shoqërisë “KAYO” sh.a. me Vendimin e Këshillit të Ministrave nr. 158, datë 12.3.2025, ishte fillimisht e dhënë me qira në vitin 2002 për një afat deri në vitin 2022 dhe ka qenë objekt i vendimeve gjyqësore të formës së prerë, duke patur kundërpalë Shoqërinë “Focus Media News”. Kontrata e qirasë e pretenduar si e vlefshme deri në vitin 2033 i referohet një pasurie tjetër, me numër dhe kufij të ndryshëm nga pasuria objekt i vendimeve gjyqësore dhe që nuk i është kaluar “KAYO” sh.a.
Ky fakt konfirmohet nga dokumentacioni zyrtar i regjistrit kadastral dhe nga planet e rilevimit, të cilat tregojnë qartë se bëhet fjalë për njësi pronësore të ndryshme. Çdo përpjekje për të paraqitur këto pasuri si të njëjta ose të lidhura, përfshirë referencat ndaj kontratave të tjera të qirasë, përveçse e pabazë është edhe një dizinformim nga ana e një media-je që duhet të tregojë të vërtetën. Asnjë interes material i pronarëve nuk e justifikon keqinformimin!
Pra janë dy gjëra e dy kontrata krejt të ndryshme dhe kjo e dyta nuk ka asnjë ndikim mbi vlefshmërinë, legjitimitetin apo ekzekutimin e vendimeve gjyqësore të formës së prerë që detyrojnë lirimin e menjëhershëm të pasurisë së kaluar nga Këshilli i Ministrave shoqërisë “KAYO” sh.a., për realizimin e objektit të saj të aktivitetit. Ministria e Ekonomisë, Kulturës dhe Inovacionit rikonfirmon se veprimet për marrjen në posedim faktik të kësaj prone janë në përputhje të plotë me ligjin dhe me vendimet e gjykatave, si dhe se pasuria është e regjistruar qartësisht si njësi e veçantë pronësore, pa lidhje me asnjë pronë tjetër të dhënë me qira përmes kontratave të ndryshme. MEKI mbetet e hapur për çdo sqarim e informacion në interes të informimit korrekt të opinionit publik dhe të gjithë të interesuarve.
