Një raport i ri tronditës i Departamentit Amerikan të Mbrojtjes (DOD) zbulon se konspiracionet rreth UFO-ve në Zonën 51 janë ushqyer me qëllim nga vetë Pentagoni gjatë Luftës së Ftohtë — për të maskuar programe të klasifikuara të armëve.
Sipas raportit të vitit 2024 të lëshuar nga Zyra për Zgjidhjen e Anomalive në të Gjitha Domenet (AARO), qeveria amerikane ka zhvilluar një fushatë të qëllimshme dezinformimi, që përfshinte edhe shpërndarjen e fotove të rreme të pjatave fluturuese te banorët lokalë.
Në vitet 1980, një kolonel i Forcave Ajrore Amerikane u tha të ketë shpërndarë foto të manipuluara të UFO-ve në një bar pranë bazës në Nevada. Këto imazhe u varën në mur dhe nisën një ortek spekulimesh publike, duke krijuar mitin se teknologjia aliene po studiohej fshehurazi në bazën ultra-sekrete.
Raporti gjithashtu zbulon se oficerët e rinj të Forcave Ajrore “përshëndeteshin” me një brifing të rremë për një projekt të quajtur ‘Yankee Blue’, ku atyre u tregohej një foto e një “anije aliene antigraviteti”. Më pas paralajmëroheshin për burg apo ekzekutim nëse flisnin – një rit hazing që besohej si i vërtetë nga qindra rekrutë.
Raporti riafirmon se Zona 51 u përdor në të vërtetë për testimin e avionëve të avancuar, si U-2 dhe A-12, gjatë Luftës së Ftohtë. Kjo u zbulua më parë në dokumente të deklasifikuara nga CIA në vitin 2013 – por zëri i UFO-ve zëvendësoi realitetin, duke krijuar mbulesën perfekte për projektet sekrete.
Drejtori i parë i AARO, Sean Kirkpatrick, që u caktua në 2022 për të analizuar qindra raportime mbi UFO-t, konfirmoi për Wall Street Journal se vetë ushtarakët janë mashtruar nga hierarkia e tyre, duke besuar për dekada në mite të fabrikuara.
Vetëm pas një memorandumi nga zyra e Sekretarit të Mbrojtjes në vitin 2023, kjo praktikë u ndal zyrtarisht. Drejtoresha e inteligjencës kombëtare, Avril Haines, mbeti e shokuar nga përmasat dhe zgjatja në kohë e mashtrimit.
Sipas zëdhënëses së Pentagonit, materiale të fabrikuara që pretendonin të përfshinin alienë janë identifikuar dhe autoritetet ligjvënëse janë informuar. Raporti i fundit ngre pikëpyetje serioze mbi sa shumë nga “të vërtetat” që kemi dëgjuar për alienët janë në fakt mbulesa për projektet më tokësore dhe ushtarake të Amerikës.
