Një vrasje brutale ka tronditur fshatin e qetë Trémolat në jugperëndim të Francës, ku 65-vjeçarja Karen Carter, një nënë britanike e katër fëmijëve, u ther për vdekje pranë shtëpisë së saj 250-vjeçare. Ajo ishte në proces divorci dhe në prag të një jete të re, por ëndrrat e saj u ndërprenë me tetë goditje të egra thike, një prej të cilave i preu aortën.
Karen sapo ishte kthyer nga një mbrëmje vere me Jean-François Guerrier, një fqinj francez 74-vjeçar me të cilin besohet se kishte një marrëdhënie të afërt. Vetëm një ditë më parë ajo i kishte thënë një mikeje se i kishte kërkuar burrit të saj, Alan Carter, divorcin dhe kishte hapur një llogari bankare të re në Francë. Por teksa po zbriste nga makina, një agresor i maskuar mes bimësisë e sulmoi me egërsi, duke e lënë të vdekur para se të mbërrinin ndihmat.
Dy persona janë marrë në pyetje dhe më pas janë liruar: Guerrier, i cili gjeti Karen në gjak dhe tentoi ta ringjallte, dhe Marie-Laure Autefort, një grua e divorcuar që thuhet se ishte e dashuruar me Guerrier. Prokuroria po heton pistën e një “vrasjeje të paramenduar” të lidhur me një trekëndësh xhelozie, ndërsa komuniteti britanik dhe vendas mbetet në panik – me vrasësin ende të lirë në një zonë që nuk njihte krimin.
