Dy furgonë kampingu dhe një VW Beetle përfunduan të përmbytur nga dallgët e fuqishme në një plazh në Uellsin e Veriut, pasi pronarët e tyre injoruan paralajmërimet për baticën e shpejtë.

Mjetet pësuan të njëjtin fat brenda pak ditësh në Black Rock Sands, një plazh piktoresk pranë Porthmadog, duke shkaktuar dëme me vlera dhjetëra mijëra paundësh.

Një furgon VW u përmbyt më 8 qershor pasi ishte parkuar mbi rërë, ndërsa një tjetër furgon kampingu u mbyt nga uji më 13 qershor, të premten. Një ditë më vonë, një Beetle kabriolet i bardhë u përfshi nga dallgët, edhe pse u shfaq sërish të nesërmen në mëngjes.

Black Rock Sands është një nga të paktët plazhe në Uellsin e Veriut ku lejohen automjetet, por pjerrësia e butë e bregut bën që batica të hyjë me shpejtësi dhe rëra e lagësht i zë shpejt mjetet në kurth, pa shumë mundësi shpëtimi pa ndihmë.

Banori lokal Kevin Gibson tha se ka parë shpesh shoferë që ngelen të bllokuar:

“Komuna vendase u merr njerëzve 8 paund për të parkuar. Është një nga plazhet e rralla ku mund të futesh me makinë dhe është shumë popullor. Por njerëzit nuk i kushtojnë rëndësi paralajmërimeve.”

Ai shtoi se shoferët paralajmërohen të mos kalojnë tabelat që njoftojnë për rërë të butë dhe baticë të shpejtë, por shumë i neglizhojnë.

“Për fat të keq, po shohim makina që përfundojnë nën ujë shumë shpesh. Më vjen keq për ta, është për të ardhur keq.”

Kevin Wardlaw, i cili pa një nga furgonët që përmbytej, tha:

“E kuptoj sa e lehtë është për njerëzit të mashtrohen, por tabelat ekzistojnë.”

Incidentet kanë hapur debat në rrjete sociale dhe media lokale për marrjen e masave shtesë, për të parandaluar dëmtimet e automjeteve dhe për të rritur ndërgjegjësimin e vizitorëve.