Një përplasje me pasoja të rënda globale ka shpërthyer pasi SHBA, nën urdhrin e Presidentit Donald Trump, ka goditur me sulme ajrore tre baza bërthamore në Iran. Goditja u përshkrua nga vetë Trump si një “sukses spektakolar ushtarak”, duke deklaruar se “kapacitetet thelbësore të pasurimit bërthamor të Iranit janë shkatërruar plotësisht”.
Në një konferencë shtypi të mbajtur në Teheran, Ministri i Jashtëm i Iranit, Abbas Araghchi, reagoi me tone të forta, duke e quajtur Trump një “rrëmbyes pa ligj” dhe “armik të diplomacisë”, që po e rikthen njerëzimin në “ligjin e xhunglës”. Ai paralajmëroi se bota është futur në një “nivel të paparë rreziku”, dhe kërkoi ndërhyrje të menjëhershme nga Kombet e Bashkuara dhe organizata të tjera ndërkombëtare:
“Heshtja sot është bashkëfajësi nesër. Duhet veprim i menjëhershëm dhe vendimtar.”
Reagimi iranian nuk vonoi. Vetëm disa orë pas bombardimeve amerikane, ushtria iraniane ndërmori një sulm të koordinuar ndaj Izraelit, me raportime për të paktën 16 të plagosur – mes tyre edhe një i ri me plagë të rënda nga copëzat e predhave.
Sipas autoriteteve izraelite, sulmet filluan rreth orës 06:30 GMT të mëngjesit të sotëm dhe synuan zona të populluara pranë qyteteve të mëdha. Gjendja e jashtëzakonshme u shpall menjëherë në jug të vendit.
Në Londër, kryeministri britanik Keir Starmer mbajti një qëndrim të kujdesshëm.
Në një deklaratë për shtyp, ai tha se sulmet amerikane ishin ndërmarrë për të “zbutur kërcënimin e rëndë që përfaqëson programi bërthamor i Iranit”. Megjithatë, Starmer i bëri thirrje Iranit që të rikthehet në tryezën e bisedimeve për të shmangur përshkallëzimin:
“Programi bërthamor i Iranit është një kërcënim serioz për sigurinë ndërkombëtare. Irani nuk duhet lejuar kurrë të zhvillojë një armë bërthamore.”
Trump, ndërkohë, e portretizoi ofensivën si një fitore totale.
Në një deklaratë të dhënë nga Shtëpia e Bardhë, ai tha se “kemi sjellë paqe duke treguar forcë. Nëse Irani dëshiron paqe tani, ka një dritare. Përndryshe, pasojat do të jenë të papërfytyrueshme.”
B-2 Stealth Bombers të forcave ajrore amerikane u përdorën për sulmin, duke lëshuar bomba të kalibrit të rëndë në tre impiante të thella nëntokësore, të cilat mendohej se përmbanin elementë kyç të programit bërthamor të Iranit.
