Sa herë i kujtojnë Edi Ramës miliona euro që u dogjën më kot tek inceneratori i Elbasanit, kryeministri i dredhon përgjegjësisë me një alibi të thjeshtë. Ai e pranon se rrugës, njerëz të besuar të tij “hëngrën mollë e dardha pas shpine, por më pas ata u dënuan me burg dhe pavarësisht vjedhjeve, ja ku është impianti në Elbasan, që përpunon mbetjet, i djeg dhe prodhon energji elektrike.
Me këtë alibi prej thuajse dhjetë viteshu përgjigjet akuzave për skandalin korruptiv që çoi në burg Lefter Kokën, Alqi Bllakon dhe dënoi të arratisurit e kompanisë private Stela Gugallja, Klodian Mërtiri dhe Klodian Zoto.
Me pak fjalë alibia e Ramës përmblidhet në këto fjali që u tha banorëve të Elbasanit në fushatën e vitit 2023.
“Pati probleme? Pati probleme. Pati njerëz që deshën me nxjerrë mjaltë nga plehrat? Pati! Ata kanë punën e vet. Por impianti është aty dhe Elbasani e ka ajrin të pastër” shprehej Rama.
Por realiteti dhe propaganda janë shumë larg. I ashtuquajturi “impiant modern” për të cilin u paguan 26 milion euro, në të vërtetë ishte një karakatinë e vendosur pranë malit me plehra në Elbasan për të justifikuar korrupsionin. Thuhet se për disa muaj e bëri punën, por pastaj u fik. Që nga ajo kohë, zyrtarët lokalë të Elbasanit qenë të detyruar t’i mbanin iso alibisë së Edi Ramës, sipas të cilit inçeneratori punon normalisht, djeg mbeturina, madje edhe prodhon energji elektrike.
Për impiantin rrangallë që u kishte mbetur në dorë justifikoheshin se është me defekt dhe pritet një riparim i vogël; herë se po punon, por me kapacitet të kufizuar e herë gënjenin haptazi se aty po prodhohet energji dhe problemi i mbeturinave ishte zgjidhur për qytetin.
Por çdo vit në dimër mali me plehra rritej me shpejtësi, ndërsa në verë mbeturinat merrnin flakë, shtëllungat gjigande të tymit ngrihen si re e zezë mbi qytet dhe nuk kishte propagandë që ta mbulonte një fakt tronditës nga i cili helmohen rregullisht qytetarët.
Prandaj në një mbledhje të Këshillit Bashkiak të zbardhur nga gazetarja Bardha Nergjoni për Reporter.al del se loja me gënjeshtrat ka mbaruar. Për herë të parë s’kanë nga t’ia mbajnë as zyrtarët socialistë, të cilët janë të detyruar t’i rrëzojnë rrenat e Ramës.
Administratori i kompanisë Eco-Elb që administron impiantin Leli Kaja e ka thënë troç se mali me plehra është aq i madh saqë ka shembur disa skarpata në landfill. Ndaj qytetit i duhet një landfill i ri.
“Duhet ndërtuar një landfill i ri. Sasia e mbetjeve ka arritur të shembë disa skarpata anësore të landfillit,” ka thënë Kaja në mbledhje.
Sipas Kajës, në landfill hyjnë çdo ditë mbi 150 ton mbetje dhe është e pamundur sistemimi i kësaj sasie. “Do të ketë përsëri rrezik,” ka paralajmëruar ai.
Në të njëjtën mbledhje, edhe kryetari i Bashkisë së Elbasanit, Gledian Llatja është detyruar të pranojë të vërtetën dhe ka folur hapur para këshilltarëve bashkiakë duke pranuar se do t’i kërkojë kryeministrit para për një landfill të ri.
“E kemi të pamundur të bëjmë një landfill të ri me buxhetin dhe i kemi shtrirë dorën qeverisë shqiptare që të bëjmë landfillin e ri. Jemi të gjithë të gatshëm të shohim vende të tjera për të landfillin e ri,” deklaroi Llatja.
Rrangalla që ndërtoi qeveria e Ramës në Elbasan i kushtoi shtetit 26 milionë euro, një projekt i kalbur që në gjenezë për shkak se kishte si qëllim vetëm vjedhjen e parave të taksave. Projekti kaloi edhe në tryezën e punës së kryeministrit Rama me një procedurë të paligjshme e quajtur “negocim pa shpallje”, por Rama refuzoi ta firmosë.
Në qeveri pati disa zëra që e kundërshtuan, sepse procedura “me negocim pa shpallje” që kishte zgjedhur Lefter Koka nuk parashikohej në ligj. Rama nuk e kundërshtoi hapur, sepse i duheshin votat e Lefter Kokës në Durrës për zgjedhjet e vitit 2017.
Në mbledhjen e qeverisë kur duhej të kalonte vendimin me nr.907, iu shmang firmës që do ta përfshinte penalisht në këtë aferë.
Vendimi u firmos nga zv.kryeministri i atëhershëm, Niko Peleshi. Dosja e SPAK sqaroi se në vendim kishte edhe një gabim teknik dhe Niko Peleshi e ka firmosur sërish dokumentin e korrigjuar.
Megjithatë, politikisht kryeministri ishte gjithnjë mbështetës i idesë së djegies së mbeturinave. Para zgjedhjeve të vitit 2017 organizoi një aktivitet të Partisë Socialiste në inceneratorin e Elbasanit, si një garanci e dhënë për Lefter Kokën, i cili ishte nën hetim nga SPAK. Siç u pa më vonë, Koka u braktis dhe iu ngarkua dënimi për të tre aferat e inceneratorëve.
Ndërkohë mali me plehra në Elbasan vazhdon të rritet. Zyrtarët lokalë janë nën presion që të mbyllin gojën dhe të mos flasin për mbeturinat që thjesht digjen në qiell të hapur dhe helmojnë qytetarët. Në një takim në kryeministri, Rama kritikoi direkt kryebashkiakun Gledian Llatja për një zjarr në varrezat e qytetit, duke i dhënë një mesazh kërcënues për të ardhmen.
