Lady Gaga ndezi skenën e Coachella-s të premten mbrëma me një performancë të jashtëzakonshme që po cilësohet si një nga më të fuqishmet dhe më provokueset në historinë e festivalit. Kjo ishte hera e dytë që ylli i pop-it, 39 vjeç, kryesonte në skenën e madhe të festivalit në Kaliforni, pas debutimit të saj si headliner në vitin 2017 – por këtë herë ajo vendosi të sfidojë çdo pritshmëri.
Seti i saj, i ndarë në katër akte dhe i përshkruar nga vetë Gaga si një “opera në shkretëtirë”, nisi me këngën Bloody Mary, ku ajo u shfaq në një fustan të kuq të zjarrtë, përballë një sfondi gothik. Pamjet vizuale u interpretuan nga shumë fansa si referenca ndaj “ritualeve satanike”, ndërsa të tjerë e panë si një shfaqje teatrale gjeniale dhe plot simbolikë.
Në vijim të koncertit, ajo interpretoi këngë si Abracadabra, Judas, Scheiße dhe Poker Face, e cila u shoqërua me një skenë që u transformua në një tabelë shahu gjigante, ku Gaga dhe trupat e saj bënë një betejë vallëzimi të koreografuar mes “palëve kundërshtare”.
Mes ndërrimeve të shumta të kostumeve, efekteve vizuale mbresëlënëse dhe vokalit të saj të fuqishëm, Lady Gaga i la spektatorët dhe fansat në ekstazë. Rrjetet sociale u mbushën me reagime të zjarrta, ku shumë e quajtën performancën si “më të mirën ndonjëherë në historinë e Coachella-s”. “Satanic rituals, betejë shahu, doppelgänger, zombi – ishte një operë Gaga! Festivalet e tjera mund të mbyllen tani,” shkroi një fans në X (ish-Twitter).
Krahas suksesit të saj në Coachella, Lady Gaga po përgatitet edhe për turin e saj të ri Mayhem Ball, që do të përfshijë koncerte në SHBA, Evropë dhe, për herë të parë pas 11 vitesh, stadiume në Australi. Biletat do të dalin në shitje më 17 prill, ndërsa Gaga pritet të ngjitet në skena ikonike si O2 Arena në Londër dhe Madison Square Garden në Nju Jork.
Gaga, e njohur për aftësinë e saj për të kombinuar artin me provokimin, e ka dëshmuar sërish se është një forcë e pakrahasueshme në industrinë e muzikës live. Dhe këtë herë, ajo nuk thjesht performoi – ajo krijoi histori.
