Në Mbretërinë e Bashkuar, bandat shqiptare tashmë njihen nga policia si dominuesit e tregut të drogës. Ato kanë larguar rivalët e tyre duke ofruar çmime më të ulëta, si dhe duke përdorur dhunë të pamëshirshme për të konsoliduar pushtetin e tyre.
Si arritën bandat shqiptare të kontrollojnë tregun e drogës në Britani?
Liderët e këtyre grupeve kriminale kanë krijuar lidhje të drejtpërdrejta me kartelet kolumbiane, duke siguruar kokainë me çmimin më të mirë dhe cilësinë më të lartë. Kjo u ka mundësuar të fitojnë mbështetjen e bandave britanike të rrugës, të cilave u kanë premtuar fitime më të mëdha.
Ky model ka bërë që kriminelë të rinj shqiptarë të marrin kontrollin e grupeve të vjetra të krimit të organizuar në qytete kryesore si Londra dhe Birminghami. Megjithatë, jo në të gjithë vendin është njësoj.
Liverpool-i , qyteti i paprekshëm nga mafia shqiptare
Ekspertët tregojnë se Liverpool-i është një nga të paktat zona në Britani ku gangsterët shqiptarë nuk kanë arritur të depërtojnë. Në këtë qytet, tregtia e drogës vazhdon të mbetet në duart e grupeve vendase, të cilat shpesh kanë lidhje të forta me komunitetet lokale që i terrorizojnë.
Një shembull i kësaj është rasti i çiftit të ri nga Liverpool, Eddie Burton (23) dhe Sian Banks (25), të cilët drejtonin një rrjet të trafikut të drogës me vlerë 20 milionë paund. Ky rrjet solli qindra kilogramë heroinë dhe kokainë dhe të fshehura në kamionë nga Evropa në Mbretërinë e Bashkuar.
Burton u arrestua nga policia spanjolle në klubin e njohur të natës “Pacha” në Ibiza në gusht të vitit 2023, çka çoi në shkatërrimin e grupit të tij nga Agjencia Kombëtare e Krimit (NCA). Ata pritet të dënohen javën e ardhshme.
Raste të tjera të bandave lokale
Një tjetër grup i trafikut të drogës, me bazë në Wirral, u dënua me 44 vite burg në fund të janarit për përdorimin e shërbimit postar të Royal Mail për të dërguar drogë në të gjithë vendin.
Ky grup, i cili përfshinte vëlla e motër, Benjamin Crane (35) dhe Abbey Crane (24), ruante sasi të mëdha droge në një magazinë në Birkenhead. Droga më pas dërgohej me postë nga një zyrë postare e vendosur në një dyqan lokal. Ata shpërndanin MDMA, ekstazi, kokainë, kërpudha halucinogjene, LSD dhe ketaminë në mbarë Britaninë.
Ndërsa bandat shqiptare kanë arritur të marrin kontrollin e tregut të drogës në shumë qytete britanike, Liverpool mbetet një qytet i krimit të organizuar vendas. Në këtë qytet, bandat lokale kanë ruajtur pushtetin e tyre dhe kanë mbajtur larg konkurrentët e huaj, duke e bërë atë një përjashtim në hartën e krimit në Mbretërinë e Bashkuar.
