OKB paralajmëron se një sulm i ri mundshëm në Gaza do të kishte një ndikim përtej katastrofës për banorët.

“Mjaft më.” Situata në Gaza ka arritur në një pikë krize, nga e cila nuk ka kthim prapa. Ky është apeli më i fundit nga Programi Botëror i Ushqimit (WFP), krahu i OKB-së për shpërndarje të barabartë të ushqimit në të gjithë planetin, për t’i dhënë fund urisë në Gaza, të cilën Izraeli vazhdon ta mohojë çdo herë, raporton Ansa. 

Drejtoresha Ekzekutive e WFP-së, Cindy McCain udhëtoi për në Khan Younis dhe Deir el-Balah, ku vizitoi një klinikë për fëmijë të kequshqyer dhe takoi nënat që po përpiqen çdo ditë të gjejnë mbetje ushqimi.

“Takova fëmijë të uritur që po trajtoheshin për kequshqyerje të rëndë dhe pashë foto të tyre kur ishin të shëndetshëm. Sot, krahasuar me ato foto, ata janë të panjohshëm”, deklaroi ajo, një dëshmi që bie ndesh me atë që deklaron Izraeli, i cili pretendon se situata humanitare në Gaza nuk është e rëndë.

McCain tha se uria në Gaza po përkeqësohet çdo ditë ndërsa bëri thirrje për rivendosjen urgjente të rrjetet të saj prej 200 pikash shpërndarjeje ushqimore, të zëvendësuara nga Izraeli dhe Shtetet e Bashkuara me Fondacionin Humanitar të Gazës. Shumë organizatat humanitare kanë shprehur shqetësimin për rrezikun e një ofensive të ardhshme izraelite në zona të tjera të qytetit të Gazës. 

Zëdhënësi i OKB-së, Stephane Dujarric, në konferencën e tij të përditshme me mediat ndërkombëtare deklaroi se disa lagje kanë pësuar sulme vdekjeprurëse ditët e fundit.  

“Kolegët tanë humanitarë na thonë se ndikimi i një ofensive në shkallë të gjerë do të ishte përtej katastrofës, jo vetëm për ata që jetojnë në qytet, por për të gjithë Rripin e Gazës”, u shpreh ai. 

Sipas OKB-së, pavarësisht lehtësimit të kufizimeve nga Izraeli për konvojet humanitare që hyjnë në Gaza, furnizimet mbeten komplekse. 

“Midis të martës dhe të mërkurës së kësaj jave, nga 89 përpjekje për të koordinuar lëvizjet me autoritetet izraelite në të gjithë Rripin e Gazës, vetëm 59 përqind u lehtësuan. 26 përqind të tjera u miratuan fillimisht, por më pas u penguan në terren, 8 përqind u refuzuan krejtësisht dhe 7 përqind u tërhoqën nga organizatorët”, tha zëdhënësi. 

Më 22 gusht, OKB shpalli zi buke në Gaza, pas publikimit të raportit të Klasifikimit të Fazës së Integruar të Sigurisë Ushqimore (IPC), i cili konfirmonte situatën tragjike humanitare të muajve të fundit në Gaza. Por Izraeli e cilësoi këtë raport si të rremë dhe të mbushur me të dhëna të Hamasit.