Teksa një delegacion amerikan zbarkon në Rusi për të bërë apel për një armëpushim të përkohshëm në Ukrainë, Kremlini bën të qartë se nuk ka ndërmend të ndalet. Ndihmësi i ngushtë i presidentit rus, Vladimir Putin, Yuri Ushakov, hodhi poshtë me vendosmëri idenë e një pauze 30-ditore, duke e cilësuar atë si një dhuratë të panevojshme për Kievin.

Në një intervistë për televizionin shtetëror rus më 13 mars, Ushakov komentoi propozimin e presidentit amerikan, Donald Trump, të cilin Ukraina e ka pranuar me shpresën se do të lehtësojë situatën në front. Por sipas tij, një armëpushim i tillë nuk do të bënte gjë tjetër veçse t’i jepte kohë Kievit të rimëkëmbet nga sulmet e vazhdueshme ruse.

“Kjo është thjesht një ndalesë strategjike për forcat ukrainase. Nuk ka asnjë përfitim real për ne,” tha Ushakov, i cili ka dekada në diplomaci dhe është një nga zërat më me peshë në politikën e jashtme të Moskës.

Sipas tij, ky qëndrim i është bërë i qartë edhe këshilltarit për siguri kombëtare të SHBA-së, Mike Waltz, gjatë një bisede telefonike të zhvilluar më parë.

“Nuk ka kuptim të bëjmë sikur po negociojmë për paqe, kur në fakt të gjithë e dimë se çfarë po ndodh,” theksoi ai, duke nënvizuar se Rusia synon një zgjidhje të përhershme, e cila – natyrisht – do të marrë parasysh vetëm interesat e Kremlinit.

Pra, mesazhi është i qartë: çdo përpjekje për të frenuar Moskën do të përplaset me refuzim të ftohtë. Dhe sanksionet e reja? Eh, ato janë thjesht një kapitull tjetër në librin e gjatë të përballjeve me Perëndimin.