Ish-konsulli britanik Colin Armstrong, 79 vjeç, dhe partnerja e tij kolumbiane Katherine Paola Santos, 30 vjeç, kanë folur për herë të parë mbi makthin që përjetuan gjatë rrëmbimit të tyre në Ekuador në dhjetor 2023. Dyshja u rrëmbyen nga një bandë prej 15 personash të armatosur në fermën e Armstrong-it pranë Guayaquil-it, ndërsa policia hetoi fillimisht nëse Santos mund të ishte përfshirë në skemë – akuza që ajo i ka mohuar kategorikisht.
Gjatë pengmarrjes, Santos u detyrua të vishte një jelek që besohej se ishte i mbushur me eksplozivë dhe u kërcënua se do të shpërthente nëse nuk zbatonte urdhrat. Pas lirimit të saj të parakohshëm, u hodhën dyshime mbi rolin e saj, por hetimet nuk zbuluan asnjë lidhje të saj me rrëmbimin. “Ishin shumë mizorë. Ndihesha e shkatërruar që njerëzit bënin shaka dhe shpifnin në një kohë kaq të tmerrshme,” tha Santos për The Times.
Një histori dashurie, pengmarrje dhe ndarje familjare
Armstrong, një biznesmen nga Yorkshire dhe pronar i atraksionit turistik Forbidden Corner, tha se gjithmonë kishte injoruar paralajmërimet për rrezikun e rrëmbimeve në Ekuador – derisa ra vetë pre e tyre. Ai tregoi se gjatë grabitjes u lidh me litar plastik, u mbështoll me një çarçaf dhe u fut në makinën e tij së bashku me partneren, për t’u transportuar në një fermë të largët.
Në intervistën e tij të parë, Armstrong zbuloi se lidhja me Santos kishte nisur në vitin 2013 dhe kishte shkaktuar përçarje me bashkëshorten e tij, Cecilia, me të cilën kishte 50 vite martesë. Megjithatë, ai theksoi se “ende e do” gruan e tij dhe nuk ka menduar kurrë për divorc.
Në fermë, rrëmbyesit kontrolluan trupat e tyre për çipe gjurmimi dhe vendosën që Santos të dorëzonte një telefon te djali i Armstrong-it, Nick, për të nisur negociatat. E pajisur me një jelek që i ishte thënë se kishte eksploziv, ajo u shoqërua nga policia, e cila më vonë zbuloi se jeleku ishte i rremë.
Ndërkohë, Armstrong mbeti në duart e rrëmbyesve që kërkuan 5 milionë dollarë. Pas negociatave, ranë dakord për një pagesë të reduktuar: 500 mijë dollarë çdo javë për një muaj. Armstrong u lirua pranë një bordelloje dhe, megjithëse i lodhur, ishte në gjendje të mirë shëndetësore kur u rikthye në familje pesë ditë para Krishtlindjes.
Policia arrestoi disa anëtarë të bandës Tiguerones, duke sekuestruar armë, eksplozivë dhe substanca të kontrolluara. Autoritetet konfirmuan se motivi i rrëmbimit ishte financiar, ndërsa shuma e saktë e paguar si shpërblim nuk u bë e ditur.
