Tensionet në Bregun Perëndimor të pushtuar u përshkallëzuan sërish, pasi vendbanues ilegalë izraelitë sulmuan qytetet Silwad, Rammun dhe Abu Falah, në lindje të Ramallahut. Sipas dëshmitarëve, sulmi ka shkaktuar përleshje të dhunshme me banorët vendas.

Burime lokale raportojnë se gjatë sulmit, vendbanuesit kanë djegur 16 automjete dhe kanë shkruar grafiti në gjuhën hebraike mbi muret e shtëpive palestineze. Pamje filmike të shpërndara online tregojnë momentet kur sulmuesit derdhin lëndë djegëse mbi makinat e parkuara dhe u vënë flakën.

Gjatë incidentit, një banor palestinez humbi jetën si pasojë e asfiksisë nga gazi lotsjellës i hedhur nga forcat izraelite, që mbërritën në vendngjarje për të mbrojtur vendbanuesit.

Ngjarja ka shkaktuar zemërim dhe frikë mes komuniteteve palestineze, ndërsa organizatat për të drejtat e njeriut kanë dënuar dhunën në rritje nga ana e vendbanuesve hebrenj në zonat e pushtuara.