A keni vënë re se në disa pjesë të ditës punoni më shpejt, mendoni më qartë dhe përqendroheni më lehtë? Nuk është rastësi – kjo lidhet me ritmet tona të brendshme biologjike, të quajtura cikle cirkadiane, që ndikojnë në momentet kur truri dhe trupi funksionojnë më mirë, raporton Danas.rs.
Një studim i publikuar në revistën Frontiers in Psychology tregon se koha midis orës 11:00 dhe 13:00 është ideale për detyra të rëndësishme, pavarësisht nëse jeni person i mëngjesit apo “natë sova”. Analiza e mbi 100.000 provimeve në një universitet italian tregoi se shanset për sukses janë më të larta pikërisht në orët e mesditës, ndërsa më herët ose më vonë gjatë ditës, ato ulen ndjeshëm.
Rënia e performancës pasdite shpjegohet me lodhjen – aftësitë kognitive të studentëve dhe të personave që i vlerësojnë ata ulen nën ndikimin e stresit, që gjithashtu ndikon në rezultatet. Studimet tregojnë se vlerësuesit e lodhur janë më të prirur të marrin vendime negative, duke ndikuar drejtpërdrejt në performancën tuaj.
Efekti është i ngjashëm edhe te të burgosurit që paraqiteshin për komisionin e lëshimit me kusht – ata që shkonin herët në mëngjes kishin 70% shanse të miratoheshin, ndërsa gjatë ditës shanset ulnin ndjeshëm, me një rritje të shkurtër pas drekës, për t’u ulur gati në zero në fund të ditës.
Përfundimi i ekspertëve është i qartë: kur është e mundur, zgjidhni me kujdes kohën për detyra të rëndësishme – qoftë provim, takim, intervistë pune apo prezantim për investitorë. Koha e duhur mund të jetë çelësi i suksesit tuaj.
