Tiranë — Pas pesë vitesh heshtjeje, qeveria shqiptare ka rikthyer në skenë projektin e Kodit Penal të prezantuar fillimisht në vitin 2020, duke e paraqitur tani si një reformë të re ligjore. Ministri i Drejtësisë, Ulsi Manja, e cilësoi draftin si një arritje moderne dhe në përputhje me standardet e BE-së, por faktet tregojnë se nuk bëhet fjalë për një kod të ri, por për një dokument të vjetër që po rishfaqet me të njëjtën përmbajtje dhe drejtues teknikë.

Në atë kohë, ish-ministrja Etilda Gjonaj kishte premtuar miratimin e kodit brenda vitit 2020, por projektligji nuk shkoi asnjëherë në Kuvend dhe u zhduk nga vëmendja publike. Rikthimi i të njëjtit draft, pa qartësi mbi ndryshimet dhe pa asnjë konsultim publik, ngre dyshime serioze mbi transparencën e procesit dhe qëllimin e vërtetë të kësaj nisme në një kohë kur vendi është nën presion për reforma të prekshme në drejtësi.