Në një kohë kur frika nga një përshkallëzim i luftës në Ukrainë po shtohet, Lituania ka njoftuar ndërtimin e një brezi të ri mbrojtës, 30 milje të gjerë, përgjatë kufirit me Rusinë dhe Bjellorusinë. I ashtuquajturi “ribbon of defence” do të përfshijë hendekë anti-tank, mina tokësore, ura të gatshme për shpërthim dhe barriera të blinduara që do të shtrihen deri në afërsi të kryeqytetit Vilnius.

Ky projekt është pjesë e një strategjie të përbashkët të shteteve baltike dhe Polonisë për të përforcuar kufijtë lindorë të NATO-s, në një kohë kur Rusia ka rritur ndjeshëm kapacitetet e saj ushtarake dhe ka paralajmëruar për një përplasje të mundshme me aleancën perëndimore.

Tre shtresa mbrojtjeje
Sipas autoriteteve lituane, struktura mbrojtëse do të jetë e organizuar në tre shtresa.

• Shtresa e parë do të përfshijë hendekë, barriera betoni dhe mina anti-tank.
• Shtresa e dytë do të ketë fortifikime për këmbësorinë dhe ura me eksploziv të gatshëm për t’u aktivizuar në rast sulmi.
• Shtresa e tretë do të shtrihet deri në brendësi të vendit, duke përfshirë ndërprerjen strategjike të rrugëve dhe prerjen e pyjeve për të bllokuar përparimin e automjeteve ruse.

Kapaciteti ushtarak dhe investimet
Lituania ka 23,000 ushtarë profesionistë dhe 104,000 rezervistë. Ajo ka rritur buxhetin e mbrojtjes në 5.5% të PBB-së, një nga shifrat më të larta në NATO.
Së fundmi, ka blerë:

• 44 tanke Leopard 2A8 nga Gjermania
• Mijëra mina anti-tank, me një kontratë prej 50 milionë euro
• Raketa të avancuara Spike LR2 nga Izraeli
• Municion standard të NATO-s (155 mm)

Kjo ndodh pasi manovrat ushtarake të vitit të kaluar treguan se forcat lituane do ta kishin të pamundur të përballonin një sulm të menjëhershëm rus pa ndihmën e menjëhershme të NATO-s.

Rreziku i Suwalki Gap dhe paralajmërimi gjerman
Gjenerali gjerman Carsten Breuer paralajmëroi se Rusia mund të nisë një sulm ndaj një vendi të NATO-s brenda katër viteve, duke e cilësuar rrezikun si “më seriozin në 40 vitet e karrierës së tij ushtarake”.
Zona më e rrezikuar mbetet korridori Suwalki, që lidh Poloninë me Lituaninë dhe ndahet nga enklava ruse e Kaliningradit dhe Bjellorusia.

Sabotazhi dhe frika në rritje
Raportet e inteligjencës në Letoni dhe Danimarkë zbulojnë se Rusia po përgatitet për sabotime në vendet e NATO-s, duke shtuar frikën për një konfrontim të ardhshëm ushtarak në krahun verilindor të aleancës.

Ndërkohë, Ukraina digjet…
Në paralel me këto zhvillime, Rusia ka shtuar ndjeshëm sulmet ndaj Ukrainës. Të paktën 93 drone dhe 2 raketa u lëshuan në një natë të vetme, duke goditur 20 zona në të gjithë vendin.
Në rajonin e Sumyt, një familje me tre fëmijë të vegjël u plagos rëndë nga sulmet ajrore, ndërsa në Odesa u shënjestruan portet dhe depot e karburantit.
Ministria e Energjisë së Ukrainës njoftoi se vetëm që nga marsi 2025, infrastruktura energjetike e vendit është sulmuar 2,900 herë.

Këto zhvillime ndodhin ndërsa presidenti amerikan Donald Trump po përpiqet të ndërmjetësojë një marrëveshje paqeje për të ngrirë luftën në Ukrainë, mes paralajmërimeve se agresioni rus sapo ka filluar.