Mes lotësh dhe emocioneve të thella, Kim Kardashian u përball sot në gjykatën e Parisit me autorët e grabitjes dramatike që i ndryshoi jetën në mënyrë të pakthyeshme në vitin 2016. “Isha e sigurt që do më përdhunonin dhe do më vrisnin”, dëshmoi ajo para trupit gjykues, ndërsa rrëfente tmerrin e atij mëngjesi të errët në një apartament luksoz gjatë Javës së Modës në Paris.

E veshur me të zeza dhe syze të errëta, ylli i njohur amerikan u prit me brohorima “wow” në Sallën Voltaire, ku u përball me 10 të pandehurit e akuzuar për grabitjen e bizhuterive me vlerë mbi 9 milionë dollarë. “Unë ju fal. Por kjo nuk e ndryshon dhimbjen, traumat dhe jetën time të shkatërruar,” tha ajo, pasi gjykatësi lexoi një letër ndjese të dërguar nga një prej autorëve.

“Kisha frikë për jetën time, vetëm doja të kthehesha te fëmijët”

Kardashian përshkroi me detaje momentin kur disa burra të veshur si policë, me rojen e portës të prangosur, hynë në dhomën e saj në orën 3 të mëngjesit, e lidhën me kabëll dhe i vendosën armën në kokë. “Njëri më shtriu në shtrat dhe më kapi këmbën. Mendova se do më përdhunonte,” tha ajo, duke shtuar se në atë moment e kishte të pamundur të përpunonte çfarë po ndodhte: “Mendova se ishte një sulm terrorist, jo grabitje.”

Pas largimit të autorëve, Kardashian arriti të çlirohej, të zbriste në katin e parë dhe të fshihej në ballkon mes shkurreve bashkë me stilisten Simone Harouche, e cila dëshmoi gjithashtu në gjyq: “Ajo bërtiste me terror në zë: ‘Kam fëmijë, dua të jetoj’. Kam frikë se mund të ishte përdhunuar. Nuk do ta harroj kurrë.”

Pasojat e grabitjes: një jetë e blinduar dhe pa liri

Kardashian pranoi se që nga ajo ditë nuk ndjehet më e sigurt: “Nuk fle dot pa pasur 4 deri në 6 roje sigurie në shtëpi.” Ajo fajësoi edhe ekspozimin e tepërt në rrjetet sociale për faktin që u bë shënjestër e bandës së quajtur les papys braqueurs – “gjyshërit grabitës”, të përbërë nga burra në moshë të thyer por me përvojë kriminale të gjatë.

Në gjyq u lexua edhe letra e ndjesës e autorit Omar le Vieux, i cili shprehej se ishte i shkatërruar nga pendesa: “Që prej asaj nate, ndërgjegjja më vret për çfarë të bëra.” Kardashian, e prekur, deklaroi se punon për drejtësinë dhe beson në rehabilitim: “Unë dua të bëhem avokate. Besoj në shanset e dyta.”

Gjyqi për grabitjen më të bujshme të dekadës në Paris vazhdon, por dëshmia e Kardashian shënoi kulmin emocional të procesit. Ajo dhe e gjithë familja e saj vazhdojnë të jetojnë me pasojat e një nate që ndau jetën e saj në “para dhe pas”.