Pekini po përgatitet për një spektakël të fuqishëm ushtarak më 3 shtator, ku do të marrin pjesë liderë të mëdhenj autokratë: Xi Jinping, Vladimir Putin dhe Kim Jong Un.
Në një demonstrim të hapur uniteti dhe sfide ndaj Perëndimit, Kina ka ftuar mbi 26 krerë shtetesh e qeverish në paradën ushtarake që do të mbahet në Sheshin Tiananmen të Pekinit për të shënuar 80-vjetorin e përfundimit të Luftës së Dytë Botërore. Sipas Ministrisë së Jashtme kineze, Presidenti rus Vladimir Putin dhe udhëheqësi koreanoverior Kim Jong Un janë vendosur në krye të listës së të ftuarve, duke vendosur skenën për një foto të jashtëzakonshme ku tre liderët autokratë do të shfaqen krah për krah në “Portën e Paqes Qiellore”.
Parada do të zgjasë 70 minuta dhe do të përfshijë mbi 10 mijë trupa, mbi 100 avionë dhe qindra mjete tokësore. Kina pritet të shfaqë dronë të rinj, sisteme bllokimi elektronik, armë hipersonike, mbrojtje ajrore e raketore, si dhe raketa strategjike – të gjitha prodhim vendas. Mes të ftuarve janë edhe kryeministri pakistanez Shehbaz Sharif, junta e Mianmarit, si dhe liderë europianë pro-rusë si Aleksandar Vuçiç dhe Robert Fico.
Prania e Kim Jong Un, e konfirmuar nga agjencia shtetërore KCNA, është vizita e tij e parë në Kinë që prej vitit 2019. Kjo ndodh pak javë pasi presidenti amerikan Donald Trump deklaroi se dëshiron të takohet me liderin koreanoverior këtë vit. Ndërkohë, marrëveshja e mbrojtjes reciproke mes Putinit dhe Kim, e nënshkruar vitin e kaluar në Phenian – e cila parashikon ndihmë të menjëhershme ushtarake në rast sulmi – ka alarmuar SHBA-në dhe aleatët aziatikë.
Kina, që është sponsori kryesor ekonomik dhe politik i Koresë së Veriut, e sheh këtë event si mundësi për të theksuar rolin e saj udhëheqës në një rend të ri botëror që sfidon hegjemoninë amerikane. Ky spektakël ushtarak shihet jo vetëm si një shfaqje force e Pekinit, por edhe si një sinjal i rrezikshëm për formimin e një boshti të ri autoritar midis Kinës, Rusisë dhe Koresë së Veriut.
