Zhvillimet për ankimimet zgjedhore brenda Partisë Demokratike kanë marrë një kthesë të re, pasi Kolegji Zgjedhor rrëzoi kërkesën e Ilir Alimehmetit për rinumërim të votave në Tiranë. Alimehmeti, kandidati i dytë më i votuar në listën e PD-së, nuk arriti të sigurojë mandatin përballë Jorida Tabakut dhe e kishte përshkallëzuar çështjen deri në instancën më të lartë të drejtësisë zgjedhore.

Ndërkohë, seanca për ankimimin e deputetit demokrat Shkëlqim Shehu në Kukës u shty për shkak të mungesës së tij në sallë. Shehu kishte kundërshtuar rezultatin pas numërimit të votave të diasporës, të cilat përmbysën avantazhin e tij fillestar, duke ia dhënë mandatin kolegut Isuf Çela.

Më herët, më 2 qershor, Komisioni i Ankesave dhe Sanksioneve (KAS) kishte rrëzuar kërkesat e tre kandidatëve – Shehu, Alimehmeti dhe Aulon Kalaja – me argumentin se ankesa duhej të bëhej nga subjekti zgjedhor, në këtë rast Partia Demokratike. Pavarësisht kësaj, kandidatët vijuan individualisht betejën në Kolegjin Zgjedhor.

Ndërkohë, Aulon Kalaja po e vazhdon ankimimin e tij për votat preferenciale edhe pranë KAS, si pjesë e Partisë së Legalitetit, e ndarë nga PD, duke e kthyer këtë proces në një sprovë të vështirë për koherencën dhe përfaqësimin e opozitës në institucionet zgjedhore.