Katy Perry përjetoi një moment të rrezikshëm në mes të koncertit të saj në San Francisko të premten mbrëma, kur skena fluturuese ku ndodhej pothuajse u përplas mbi publik.

Teksa këngëtarja 40-vjeçare po performonte këngën e saj të njohur “Roar” mbi një flutur gjigante artificiale, struktura u ul papritur me disa metra mbi audiencë përpara se të ndalonte, sipas disa videove të publikuara në rrjetin X (ish-Twitter). Në pamje, Perry ndalon këndimin për pak çaste për t’u stabilizuar, më pas vazhdon performancën si një profesioniste e vërtetë.

Incidenti ndodhi në Chase Center gjatë turit të saj “Lifetimes Tour”, në pjesën e fundit të koncertit. Për fat të mirë, pjesa tjetër e shfaqjes u përmbyll pa probleme.

Të shtunën, Perry duket se iu referua episodit përmes një postimi ironik në Instagram Story, ku ndau një foto të fytyrës së saj gjatë momentit të rënies, duke shkruar: “Natën e mirë, San Fran.”

Përfaqësuesit e këngëtares nuk janë përgjigjur ende për koment.

Kjo nuk është hera e parë që Perry përjeton një incident të tillë: disa javë më parë, gjatë një koncerti në Australi, një sferë fluturuese ku ajo ndodhej nisi të anohej, duke e detyruar këngëtaren të mbahej fort pas kabllove që e mbanin pezull.

Ngjarje të ngjashme kanë ndodhur edhe me yje të tjerë të muzikës. Në një koncert të muajit të kaluar në Houston, Beyoncé u detyrua të ndalte për pak performancën e saj në turin “Cowboy Carter” pasi makina fluturuese ku ndodhej pësoi një defekt.

“If ever I fall, I know y’all will catch me,” tha më pas Beyoncé për fansat.