Negociatat për një marrëveshje për lirimin e pengjeve dhe një armëpushim në Gaza kanë hyrë në ngërç, ndërsa kryeministri izraelit Benjamin Netanyahu po shtyn për zgjerimin e ofensivës ushtarake dhe Hamas këmbëngul që kriza humanitare të trajtohet para çdo rifillimi bisedimesh.
Sipas burimeve izraelite, Netanyahu do t’i kërkojë kabinetit të sigurisë këtë të martë të mbështesë “pushtimin e plotë të Rripit të Gazës”, një skenar që është cilësuar si i papranueshëm nga disa pjesëtarë të ushtrisë për shkak të rrezikut që paraqet për pengjet e mbetura – rreth 50, nga të cilët vetëm 20 besohet se janë ende gjallë.
Reagimet nuk munguan as brenda vetë Izraelit. Nëna të ushtarëve dhe forumi i familjeve të pengjeve paralajmëruan se një ofensivë e tillë mund të ishte fatale si për pengjet, ashtu edhe për ushtarët. “Pretendimi se fitorja ushtarake do sjellë lirimin e pengjeve është një mashtrim publik,” u shpreh forumi.
Në anën tjetër, Hamas deklaron se nuk do të kthehet në bisedime pa trajtimin e katastrofës humanitare. Sipas Organizatës Botërore të Shëndetësisë, vetëm në dy javët e para të korrikut, mbi 5,000 fëmijë nën moshën 5 vjeç janë trajtuar për kequshqyerje në Gaza.
Çdo ditë kërkohen 600 kamionë ndihma, por sipas të dhënave palestineze, kanë hyrë mesatarisht vetëm 84 në javën e fundit. Edhe kamionët që arrijnë shpesh grabiten nga civilë të uritur ose banda të organizuara, ndërsa OKB konfirmoi se që nga fundi i majit janë vrarë rreth 1,400 persona teksa kërkonin ushqim, shumica nga forcat izraelite sipas raportimeve të agjencisë.
Ndërkohë, i dërguari i posaçëm i SHBA për Lindjen e Mesme, Steve Witkoff, takoi familjet e pengjeve në Tel Aviv, duke u shprehur se “plani është të mos zgjerohet lufta, por të përfundojë” dhe se zgjidhja duhet të jetë “e gjitha ose asgjë” – pra marrëveshje e plotë për të gjithë pengjet dhe përfundim i luftës.
Konfuzioni thellohet më tej me presionet e brendshme: qindra ish-zyrtarë të sigurisë në Izrael i kanë dërguar një letër Donald Trump-it duke i kërkuar të ndërhyjë për të ndalur luftën. “Kjo luftë nisi e drejtë, por tashmë nuk është më,” deklaroi Ami Ayalon, ish-drejtues i Shërbimit të Sigurisë Shin Bet.
Megjithatë, elementët e ekstremit të djathtë brenda qeverisë izraelite vijojnë të shtyjnë për pushtim të plotë dhe shpopullimin e Gazës, duke e kthyer krizën nga ushtarake në një katastrofë të thellë politike dhe humanitare me pasoja të paparashikueshme.
