Në një zhvillim që pritet të ketë ndikim të drejtpërdrejtë edhe në dinamikën politike shqiptare, në Berlin është drejt zyrtarizimit emërimi i Johan Wadephul si Ministër i Jashtëm i Gjermanisë. Wadephul, një nga figurat më të besuara të kancelarit Friedrich Merz dhe zëvendëskryetar i grupit parlamentar të CDU/CSU, njihet prej vitesh si një mik i Shqipërisë dhe si mbështetës i palëkundur i zgjerimit europian në Ballkanin Perëndimor.
Ky zhvillim merr një rëndësi të veçantë për opozitën shqiptare, dhe veçanërisht për deputeten e Partisë Demokratike Jorida Tabaku, kryetare e Komisionit të Çështjeve Europiane në Kuvend. Marrëdhënia e ndërtuar ndër vite midis Tabakut dhe Wadephul ka qenë e bazuar në bashkëpunim të ngushtë, besim të ndërsjellë dhe përkushtim ndaj reformave demokratike që përkojnë me vlerat e Bashkimit Europian. Wadephul ka qenë një nga zërat që ka ndjekur nga afër proceset politike dhe ekonomike në Shqipëri, duke dhënë mbështetje të qartë për aktorët që kanë punuar për forcimin e sundimit të ligjit dhe demokracisë.
Për Shqipërinë, emërimi i Wadephul në krye të diplomacisë së fuqisë më të madhe ekonomike të BE-së përbën një mundësi të artë për të rigjallëruar axhendën europiane të vendit dhe për të siguruar një partner të fuqishëm në tryezat ndërkombëtare. Për opozitën shqiptare, dhe në mënyrë të veçantë për Jorida Tabakun, ky është gjithashtu një sinjal i fortë që angazhimi dhe serioziteti në mbrojtjen e reformave demokratike dhe të standardeve europiane nuk kanë kaluar pa u vënë re nga partnerët kryesorë të Shqipërisë në Evropë.
Në një kohë kur vendi përballet me sfida të rëndësishme në procesin e integrimit, mbështetja politike dhe diplomatike nga figura si Wadephul mund të jetë vendimtare për të nxitur reformat dhe për të forcuar rrugën drejt anëtarësimit në Bashkimin Europian. Për Jorida Tabakun, kjo përfaqëson jo vetëm një konfirmim të rolit të saj në skenën politike shqiptare, por edhe një mundësi për të intensifikuar marrëdhëniet me vendet kryesore të BE-së në funksion të interesave strategjike të Shqipërisë.
