Ndërsa shumë të rinj në Mbretërinë e Bashkuar ankohen për mungesën e mundësive në tregun e punës, një numër gjithnjë e më i madh i tyre po gjen një zgjidhje të pazakontë në anën tjetër të botës – në minierat australiane. Gratë britanike po udhëtojnë drejt Australisë për të punuar si punonjëse FIFO (Fly In Fly Out), duke fituar deri në 4,400 paund për vetëm dy javë punë intensive.
FIFO është një formë punësimi që përfshin udhëtimin e punonjësve në zona të largëta për turne të gjatë pune, dhe është bërë gjithnjë e më popullore në sektorët e minierave, veçanërisht në Queensland dhe Australinë Perëndimore.
Një nga këto të reja është Caithilín Hughes, 26 vjeçe, e diplomuar për film nga Queen’s University në Belfast, e cila la jetën në Derry për të punuar si operatore makinerish në minierat e Perth-it. Me një pagë që arrin rreth 55 dollarë australianë në orë, ajo punon 12 orë në ditë për 14 ditë rresht, duke përfituar mbi 9,000 dollarë para taksave – rreth 4,400 paund.
Caithilín rrëfen në TikTok dhe në intervista se puna është fizike dhe kërkuese, por shpërblimi është i madh. Ajo përshkruan orarin e saj të rreptë që nis në 3:30 të mëngjesit dhe përfundon pas 12 orësh duke drejtuar kamionë të mëdhenj 777.
Për të siguruar punën, ajo kontaktoi rreth 30 agjenci, ndërsa vajza të tjera si Aimee Gale nga Anglia, japin këshilla praktike për të hyrë në këtë industri, përfshirë marrjen e certifikatave të nevojshme si “white card”, “working at heights” dhe “gas testing”.
Por, jeta në miniera nuk është vetëm para. TikToker-et si Faith Isabel, Jess Riches dhe Mariah Fishwick ndajnë realitetin e punës: izolimi nga familja, temperaturat ekstreme dhe oraret rraskapitëse. Megjithatë, në ditët e pushimit, ato shijojnë plazhet australiane, netët në rooftop-e dhe udhëtimet luksoze.
Edhe meshkujt po ndjekin të njëjtin trend. Tom Gisbourne, 24 vjeç, la Anglinë për minierat australiane dhe thotë se fitoi 8,000 dollarë për dy javë punë – refuzoi universitetin për një jetë ndryshe me shumë më pak formalitete dhe shumë më shumë të ardhura.
Pavarësisht sfidave, për shumë të rinj kjo formë pune është bërë rruga më e shpejtë drejt pavarësisë financiare, një aventurë që i përball me realitetin e fortë të jetës në terren, por edhe me shpërblimet që shkojnë përtej çdo pune zyre në Britani.
