Zëvendëspresidenti i SHBA-së, JD Vance, reagoi të mërkurën mbi rastësinë e çuditshme të vdekjes së Papa Françeskut, vetëm disa orë pasi ishte takuar me Atin e Shenjtë të dielën e Pashkëve.

Vance foli për gazetarët ndërsa po përgatitej të largohej me familjen nga një vizitë në Indi.

“E dija që ishte shumë i sëmurë. Por nuk e kuptova sa keq ishte gjendja e tij,” tha ai.

Pas vdekjes së Papës, figura të ndryshme politike bënë komente me humor të zi, duke sugjeruar me shaka se zëvendëspresidenti kishte shkaktuar vdekjen e Papës vetëm duke i shtrënguar dorën.

“Okay, JD vrau Papën,” shkroi Jack Schlossberg, anëtar i familjes Kennedy, në rrjetet sociale.

Komentatorja politike Ann Coulter gjithashtu bëri shaka lidhur me kohën e vdekjes së Papës:

“Punë e mirë, JD,” shkroi ajo menjëherë pas lajmit për ndarjen nga jeta të Atit të Shenjtë.

Vance e pranoi se momenti i vdekjes së Papës ishte “mjaft i çuditshëm”, por tha se e konsideronte veten me fat që pati mundësinë ta takonte.

I pyetur për dallimet që administrata e tij kishte me Papa Françeskun, Vance u shpreh se ishte i vetëdijshëm për to, por theksoi se kishte edhe çështje me të cilat ishin në një mendje.

“Nuk dua të njollos trashëgiminë e këtij njeriu duke folur për politikë. Unë mendoj se ai ishte një pastor i madh i krishterë, dhe kështu dua ta kujtoj Atin e Shenjtë,” tha ai.

Kur u pyet se çfarë lloj pape do të dëshironte të shihte në Vatikan, Vance qeshi:

“Nuk do të pretendoj se mund t’u jap udhëzime kardinalëve për kë duhet të zgjedhin si Papë… thjesht do të lutem për mençurinë e tyre,” përfundoi ai.