Në një vizitë zyrtare në Romë të premten, Zëvendëspresidenti amerikan JD Vance u shfaq i buzëqeshur teksa mbërriti me familjen e tij për të festuar Pashkët në Vatikan, ndërkohë që deklaroi se ndjen “optimizëm” për përfundimin e luftës mes Rusisë dhe Ukrainës. Në takimin me kryeministren italiane Giorgia Meloni, ai tha se kishte për t’i dhënë një përditësim mbi negociatat më të fundit, duke theksuar se zhvillime interesante kishin ndodhur edhe gjatë 24 orëve të fundit.
“Unë nuk dua t’i paragjykoj ato, por ne jemi optimistë se mund ta sjellim këtë luftë, këtë luftë shumë brutale, drejt përfundimit,” u shpreh Vance për gazetarët në selinë e qeverisë italiane. Vizita e tij vjen në një moment kur administrata Trump po sinjalizon se mund të heqë dorë nga përpjekjet për pajtim nëse nuk arrihet progres në ditët në vijim.
Kjo është vizita e parë e Vance në Evropë që nga fjalimi i tij i ashpër në Konferencën e Sigurisë në Mynih në shkurt, ku kritikoi vendet e BE-së dhe kërkoi që ato të marrin më shumë përgjegjësi për sigurinë e kontinentit. Ndërkohë, ai ndau me Melonin edhe diskutime rreth bisedimeve për një marrëveshje tregtare SHBA-BE, pas kërcënimeve të Trump për vendosjen e tarifave të reja ndaj eksporteve evropiane – një masë që do të godiste ndjeshëm ekonominë italiane.
Vance, i cili u konvertua në katolicizëm në të 30-at, është në Itali me gruan dhe tre fëmijët për të marrë pjesë në meshën e të Premtes së Madhe dhe për të kremtuar Pashkët në Shën Pjetër. Më vonë gjatë vizitës, ai do të takohet me kardinalin Pietro Parolin, Sekretarin e Shtetit të Vatikanit.
Ndërkohë që Meloni mban një qëndrim të palëkundur në mbështetje të Ukrainës, duke dënuar sulmet ruse si “të neveritshme”, marrëdhëniet e Trump dhe Vance me Kiev janë përkeqësuar. Në shkurt, ata kritikuan publikisht presidentin ukrainas Zelensky në një takim të transmetuar nga Shtëpia e Bardhë, ndërsa Trump vazhdon të shmangë përgjegjësinë ruse për nisjen e luftës, duke deklaruar: “Nuk e fajësoj Zelenskyn, por nuk jam i kënaqur që ajo luftë nisi.”
Pavarësisht kësaj tensioni në prapaskenë, takimi Meloni–Vance u zhvillua në një atmosferë të ngrohtë, me fokus në përpjekjet për të zbutur konfliktet tregtare dhe për të mbështetur një zgjidhje diplomatike për luftën në Ukrainë – për aq kohë sa ende ekziston një dritare për paqe.
